Saturday, 30 August 2008

Atentati ndaj Gordon Braun, ndalohet shqiptari nga Kosova

Mediat britanike: Në komplot janë përfshirë 4 persona

Nga Londra
Muhamed Veliu

Në planin konspirativ për të vrarë Kryeministrin britanik, Gordon Braun, raportohet të ketë qenë i përfshirë edhe një shqiptar nga Kosova.

Mediat britanike kanë raportuar gjatë ditës së djeshme lajmin e ndalimit të një personi 29-vjeçar, që besohet të jetë nga Kosova.
Në dy artikuj të njëpasnjëshëm gazeta "Evening Telegraph", duke iu referuar burimeve që po hetojnë këtë komplot, shkruan se personi i katërt i dyshuar, si pjesëmarrës në këtë konspiracion, është shqiptar. Sipas kësaj gazete, 29-vjeçari është ndaluar në shtëpinë e tij, në rrugën "Moore Street", Normanton, si i dyshuar në përfshirjen e akteve terroriste, vepër penale e parashikuar nga Akti i Terrorizmit 2000. Hetuesit kanë në dispozicion 28 ditë për ta marrë atë në pyetje dhe për të ngritur akuzat përkatëse, ose ta lënë të lirë. Një zëdhënës i "Greater Manchester Police", i konfirmoi gazetës "Shqip" ndalimin e një personi, por nuk ka pranuar të komentojë për nacionalitetin e tij.

"Ne nuk mund të komentojmë nacionalitetin e një personi të ndaluar, i cili po merret në pyetje për aq kohë sa ndaj tij nuk është ngritur ende ndonjë akuzë konkrete", ka thënë ai. Mësohet se policia ka kontrolluar banesën e personit të ndaluar dhe ka sekuestruar dy makina të parkuara përpara shtëpisë së tij, ku banonte ai. Arrestimi personit, që thuhet të jetë me origjinë nga Kosova, është kryer nga policia e zonës së Lancashire, në bashkëpunim me skuadrën e antiterrorizmit në policinë e Greater Mançester. Burimet policore kanë pohuar për median angleze se arrestimet kanë të bëjnë me një konspiracion për vrasjen e kryeministrit Gordon Braun dhe paraardhësit të tij Tony Blair.

Gazetarët e "Evening Telegraph", gazetë lokale e zonës ku jetonte kosovari, kanë nisur kërkime të "ethshme" për t‘i zbuluar emrin dhe të mësojnë më shumë për të. Fareed Hussain, anëtar i një forumi mysliman i zonës Derbi, ka pohuar se ai nuk ia dinte emrin e kosovarit të ndaluar. "Ne nuk kemi informacion rreth tij. E vetmja gjë që ne dimë është se ai është kosovar", ka pohuar ai.

Tre britanikë, me origjinë myslimane, kanë dalë dje përpara gjykatave londineze si të akuzuar për kërcim dhe eliminim të kryeministrit Gordon Braun dhe ish-kryeministrit Tony Blair. Krahas kësaj akuze, të katërt akuzohen si pjesëtarë të Al-Kaedës, për degën e Britanisë së Madhe, duke inkurajuar persona të tjerë për t‘iu bashkuar kësaj organizate.



You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Sunday, 24 August 2008

Martesat në Angli, dritë jeshile për shqiptarët ilegalë

Dhoma e Lordëve rrëzon apelin e kërkuar nga qeveria për mbajtjen në fuqi të kufizimit të kësaj të drejte

Nga Londra
Muhamed Veliu


Institucioni më i lartë i drejtësisë britanike “House of Lords” (Dhoma e Lordëve) përmes një vendimi, ka hedhur poshtë një apel të qeverisë britanike me të cilin kërkohej njohja si e drejtë e ligjit që ndalon martesat e personave që jetojnë ilegalisht në Angli me shtetas britanik apo europian.
Katër Lordë dhe një Baroneshë që morën në shqyrtim këtë çështje e kanë hedhur poshtë kërkesën e përfaqsusve të qeverisë angleze, kërkohej rinkonfirmimi se sekretari shtetit të ketë kontroll mbi aplikimet për çertifikat e martesës, sipas seksionit 19 të “Asylum and Immigration Act 2004.
Lordët kanë marrë në shqyrtim kërkesën nëse kontrolli mbi aplikimet për çertifikat e martesës, është në kundërshim sipas artikullit 12 të Konventës Europiane të Drejtave të Njeriut.
Ata kanë shqytruar tre raste të ngjashme për të njëjtin problem. Mosdhënjen e çertifikatës së martesës nga autoritet përkatëse pasi njëri nga bashkëshortët ishte ilegalish në Britaninë e Madhe por kur ata kanë çuar çështjen në Gjykatën e Lartë u është lejuar martesa.
Qeveria angleze inicuese e apelit në Dhomën e Londëve pasi ka humbur tre raste në Gjykatën e Lartë “Royal Court of Justice” ka dashur të demostrojë përse kontrolli mbi aplikimet për çertifikat e martesës, sipas seksionit 19 të “Asylum and Immigration Act 2004 është i drejtë në ato raste kur kemi të bëjmë me persona që janë ilegalisht në UK dhe duan të martohen.

Rastet

Gjykata e apelit “Royal Court of Justice” më 23 Maj 2007 e quajti të drejtë martesën mes Zotit Baiai shtetas algjerian i cili jetonte ilegalisht në Angli me Zonjushën Trzcinska shtetase polake me të drejtë qëndrimi në UK pasi Polonia është antare BE-së.
Ky vendim detyroi autoritetet britanike të lëshojnë çertifikatën e martesës njohur si “CoA” “Certificate of Approval”.
Në vendimin e gjykatës së apelit për këtë çështje në paragrafin 61 të tij thuhet:
“Statusi qëndrimit të Zotit Baiai është irrelevant me propozimin e ndershëm për martesë, fakt i vetëm i cili i jep atij liri për të ushtruar të drejtën e martesës”.
Ky qëndrim i gjykatësit të apelit është përkrahur nga Dhoma e Lordëve duke u cituar në vendimin e Lordëve për këtë çështje.
Po për qëllim të këtij apeli qeveria ka zgjedhur edhe rastin e dy shtetasve shqipatrë Zotit Bigoku dhe Zonjushës Agolli.
Edhe atyre ministria përkatëse që lëshon “Certificate of Approval” u detyrua ta japë atë pasi shqiptarët ju drejtuan gjykatës për rishikm ligjor “Judicial Review” por çështja nuk shkoi për gjykim pasi avokatët e qeverisë angleze u tërhoqën nga vazhdimi procesit.

Vendimi

Pasi ka shqyrtuar gjashtë argumenat të përfaqësueses së qeverisë angleze Lord Rodger of Earlfery nuk ëhtë bindur dhe ka ka hedhur poshtë apelin e qeverisë bazuar në vendimet e përpërparshme të gjykatë së apelit e cila ka dhënë të drejtën për tu martuar në rastet kur njëri prej parnerëve nuk ka patur leje qëndrimi.
Bazuar në artikullit 12 të Konventës Europiane të Drejtave të Njeriut, Lord Bingham of Cornhill, Lord Rodger of Earlsferry, Baronnes Hale of Richmond, Lord Brown of Eaton-under-Hezwood dhe Lord Neuberger of Abbotsburz nuk e kanë quajtur të drejte praktikën e ndjekur për mos lejimin e martesave të kësaj natyre.
Ata shkojnë më tej në vendim duke e cilësuar këtë praktikë si diskriminuse si për ata që kryejnë martesa me ceremoni civile apo të tipit Anglikan (në kishë).
Në fund të vendimit prej 21 faqesh kopje e së cilës është siguruar nga gazeta Shqip, Lordi Bingham propozon që përveç hedhjes poshtë të këtij apeli të bëhen ndryshimet e duhuara rreth praktikës së ndjekur deri mëtani.


You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Wednesday, 20 August 2008

Rrjeti i kokaines, denohen pese shqiptare ne Angli

Shpërndanin lëndën narkotike në klubet e natës

Nga Londra
Muhamed Veliu

Pesë shqiptarë të përfshirë në shitjen e kokainës nëpër lokalet e natës në Angli janë dënuar me 17 vite e tre muaj burg në total.
Ata kishin ndërtuar një rrjet me klientë, duke ja shitur pluhurin e bardhë për 60 sterlina një gram. Momentin e arrestimit në shtëpinë e Enkel Bushatit u gjet një sasi prej 500 gramë drogë, me vlerë 30 mijë sterlina. Nga analizat rezultoi se droga ishte e pastër, e tipit kokainë. Bushati bashkëpunonte në shpërndarjen e drogës në qytetin Northampton në veri të Anglisë me Edmir Myselinin. Në shtëpinë e këtij të fundit u gjet drogë me vlerë 1500 sterlina, një pasaportë e falsifikuar dhe një peshore elektronike. Të dy shqiptarët i kanë pranuar akuzat në gjykatë për posedim dhe shpërndarje të lëndëve narkotike të klasit A.

Enkel Bushati është dënuar me katër vite burg. Ndërsa Edmir Myselini është dënuar me 15 muaj burg. Në fund të vuajtjes së dënimit, ata do të dëbohen nga Anglia. Po në këtë qytet, nga një tjetër operacion policor do të arrestohej një tjetër shqiptar. Në shtëpinë e Arian Lamajt, 23 vjeç, policia e kapi atë duke përgatitur 1,8 kg kokainë për shitje. Droga e kapur ishte 100% e pastër me vlerë 160 mijë paund. Momentin e arrestimit, Lamajt iu gjetën në xhep vetëm 210 sterlina. Nga hetimi rezultoi se ai mund të ketë fituar 202573 sterlina, të cilat nuk janë gjetur kurrë. Policia beson se paratë janë transferuar në Shqipëri.

Lamaj së bashku me pesë persona të tjerë që të gjithë anglez, që prej katër muajsh përpara ditës së arrestimit,ishin nën survejimin policor. Ai do të dënohej me gjashtë vite burg. Nuk i ka shpëtuar survejimit policor në Londër edhe Arian Muçaj. Edhe ky një tjetër shpërndarës droge në kryeqytetin britanik. Mbrëmjen e 21 tetorit 2007, kur u ndalua nga policia, atij ju gjetën në xhep 50 porcione 1 gramëshe droge të tipit kokainë. Policia kishte kohë që survejonte lëvizjet e Muçajt.

Ai është dënuar me tre vite burg nga gjykata e krimeve Southwark Crown Court në Londër. Admir Dega nuk do t‘i shpëtonte arrestimit pas një kohe të gjatë si shpërndarës droge. I riu 23-vjeçar do të arrestohej në qendër të Londrës, disa momente pasi i ka shitur një përdoruesi 1 gram kokainë. Policia, pasi e ka ndaluar dhe kontrolluar, i ka kapur shqiptarit 44 gramë drogë të paketuara në copa një gramëshe gati për t‘ shitur. Tani, Degës do t‘ duhet të vuaj në burgjet angleze 3 vite burg.

Oxford-Superoperacioni policor prangosi 12 shqiptarë

Pas tre vjet survejimi,antidroga angleze mundi të shkatërrojë një organizatë kriminale shqiptare që shiste kokainë në qytetin e Oxfordit dhe Anglinë veriore. Gjatë operacionit policor, ku morën pjesë 200 policë, u ekzekutuan 23 kontrolle shtëpish, në dy prej të cilave shqiptarët kishin ndërtuar laboratorë për përzierjen e saj. Ftohtësinë e prangave angleze e kanë provuar 12 shqiptarë dhe dy britanikë.

Prokuroria ka dërguar në gjykatën "Oxford Crown Court" tetë shqiptarë dhe dy britanikë, me akuzat për konspiracionin në shitjen e narkotikëve të klasit A. Katër shqiptarët e tjerë po hetohen në gjendje të lire. Të arrestuarit janë Elton Celbeqiri 28 vjeç, Oltjon Nezha, 34 vjeç, Leon Cohadari, 30 vjeç, Gentian Harizaj, 26 vjeç, Elmond Koshaj, 34 vjeç, Ulijan Nelku, 29 vjeç, Klodian Kono, 37 vjeç, Albert Kovaçi, 35 vjeç, si dhe dy britanikëve Rickson Gill, 24 vjeç, Stephen Munro, 29 vjeç.

Sipas "Thames Valley Police", që organizoi operacionin e shkatërrimit të këtij grupi kriminal, mësohet se gjatë kontrollit është sekuestruar një sasi e konsiderueshme kokaine dhe disa mijëra paund në adresat e kontrolluara.

Në seancën e parë gjyqësore të caktimit të masës së arrestit në gjykatën e krimeve në Oksford, ata kanë mohuar akuzat e ngritura nga prokuroria për konspiracion në tregtimin e drogës së kategorisë A, ndërsa gjykatësi vendosi që ata të qëndrojnë në burg deri në seancën e radhës. Procesi gjyqësor në ngarkim të tyre do të zhvillohet më 5 janar 2009.


You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Tuesday, 12 August 2008

Shteti shqiptar fiton gjyqin në Londër

Premtimi i Alibeajt për rigjykim prish rregullin e vendosur nga Gjykata e Lartë britanike

Nga Londra
Muhamed Veliu

Drejtësia shqiptare ka fituar një sfidë të rëndësishme në Gjykatën e Lartë britanike "Royal Court of Justice" në Londër, e cila ka rrëzuar apelin e një shqiptari, që kërkonte të bllokonte ekstradimin për në Shqipëri.

Ndërkohë, një tjetër sfidë akoma më e rëndësishme e pret atë me rigjykimin e Armand Bogdanit, i cili është dënuar me 13 vite burg në mungesë, si i dyshuar në trafikun e 1720 kilogramëve kanabis sativa drejt Greqisë në vitin 2002.Rigjykimi ka qenë "thembra e Akilit" gjatë apelit zhvilluar në Gjykatën e Lartë britanike.

Avokatët mbrojtës të Bogdanit, duke u bazuar në precedentët e vendosur nga Fatmir Bleta dhe Vullnet Muçelli, kanë tentuar të bllokojnë ekstradimin, duke pohuar se rigjykimi nuk është i aplikueshëm në Shqipëri për personat e gjykuar në mungesë, që ekstradohen nga vendet e tjera, gjë e cila bie ndesh me ligjin britanik të ekstradimeve "Extradition act 2003".

Garancitë e dhëna nga vetë ministri shqiptar i Drejtësisë, Enkelejd Alibeaj, nëpërmjet një shkrese zyrtare, ka bërë që shteti shqiptar ta fitojë këtë apel, duke i hapur rrugën e ekstradimit të shtetasit Armand Bogdani me banim në qytetin Nottingham në Angli. Mbi të gjitha, ky rast shënon një precendet për drejtësinë britanike, duke marrë një rëndësi të veçantë për proceset e mëvonshme të ekstradimeve që do të kërkohen nga Shqipëria.

Pavarësisht këtyre zhvillimeve pozitive për drejtësinë shqiptare, çështja e Armand Bogdanit, i cili ka nënshtetësinë britanike dhe pritet të ekstradohet nga Anglia në ditët në vazhdim, nuk mbaron këtu. Vetë Bogdani thotë se ai e pret shumë qetësisht ekstradimin dhe është i bindur se e vërteta do të mësohet mjaft shpejt."Shpresoj shumë në drejtësinë shqiptare. Shkoj atje me mendjen e mbushur se jam i pafajshëm.

Në Angli kam ndërtuar disa biznese të miat, të cilat nuk kam ndërmend t‘i shesh, pasi shpejt do të rikthehem si një njeri i lirë për të vazhduar jetën normale me bashkëshorten dhe vajzën time", ka pohuar Armand Bogdani. Gjatë një interviste për gazetën "Shqip", bashkëshortja e tij, zonja Debbie Bogdani, thotë se posedon prova të mjaftueshme, të cilat vërtetojnë se bashkëshorti i saj është i pafajshëm.

Britanikja shpreson se drejtësia do të vendoset në vend për burrin e saj, me të cilin ka ndërtuar një familje dhe kanë një vajzë 13-muajshe dhe e cilëson si "drita e jetës së tyre". Ajo pohon se do ta lërë Anglinë për të jetuar në Shqipëri, në mënyrë që t‘i bëhet krah atij në procesin e rigjykimit.

Intervista

Bashkëshortja e të dënuarit: Kemi prova pafajësie Rigjykimi, shpresë për të rifituar lirinë

Tashmë Armand Bogdanit nuk i mbetet gjë tjetër veçse të luftojë fort për të bindur gjykatën shqiptare për pretendimet e tij. Bashkëshortja Debbie Bogdani ka shpresë se burri do të dalë shpejt nga burgu, pasi beson se ai është i pafajshëm dhe se sistemi i drejtësisë në Shqipëri funksionon. Shtetasja britanike ka planifikuar tashmë strategjinë e mbrojtjes së bashkëshortit.

A keni pasur dijeni që emri i burrit tuaj, zotit Armand Bogdani, ishte përmendur në polici si një person i përfshirë në trafikun e drogës drejt Greqisë?

Unë nuk kam pasur dijeni që emri i Armandit është përmendur në polici si i përfshirë në një krim të tillë. Përpara se ai të arrestohej nga skuadra e ekstradimeve në Metropolitane Police, m‘u tregua një artikull i botuar në një gazetë shqiptare në lidhje me ngjarjen.Që atë moment, kur kuptova se ai ishte një person në kërkim, në mënyrë imediate kërkova ndihmë përmes e-mail-eve të dërguara shumë departamenteve të drejtësisë dhe shtetit shqiptar. Deri më sot nuk kam marrë asnjë përgjigje, edhe pse e kërkoja ndihmën e tyre në mënyrë urgjente.

Si reaguat kur në derën e shtëpisë suaj në Nottingham erdhi policia për të ekzekutuar një mandat ndërkombëtar arresti, të lëshuar nga autoritetet policore shqiptare?

Ishte shokuese. Tërësisht e pabesueshme. Policët erdhën në mbrëmje, në orën 21:30, para se ta arrestonin Armandin. Sapo kisha vënë në krevat vajzën. Atëherë ajo ishte vetëm dyjavëshe. Armandi nuk ishte në shtëpi. Kishte shkuar për të vizituar disa miq. Të nesërmen në mëngjes, Armandi u telefonoi atyre në numrin që më kishin lënë. U tha se mund të vinin për ta vizituar, pasi ndodhej në shtëpi. Nuk kishim asgjë për të fshehur. Donim që kjo çështje të merrte zgjidhje. Policët erdhën dhe e arrestuan menjëherë Armandin. U mërzita shumë, pasi kisha në shtëpi gjashtë policë, ndërkohë që në krahë mbaja vajzën dyjavëshe, duke parë bashkëshortin tim që u mor nga policia dhe komshinjtë që shikonin nga cepi tjetër i rrugës. Ndjeva për një moment jetën time të shkatërrohej. Shumë shpejt, e gjitha kjo m‘u kthye në një dëshirë e forcë të madhe për të provuar pafajësinë e tim shqoi me çdo kusht dhe kosto.

Zonja Bogdani, ju thoni se mund ta provoni pafajësinë e bashkëshortit tuaj, duke paraqitur prova. Mund të na i tregoni këto prova?

Këto prova do t‘i paraqiten gjykatës përmes avokatit tonë në Tiranë, në seancën e parë të rigjykimit. Mund t‘ju them me përgjegjësi të plotë se kam në dispozicion dokumente zyrtare që provojnë se bashkëshorti im nuk ka asnjë lloj përfshirje në krimin që akuzohet dhe është dënuar në mungesë. Kam prova që vërtetojnë se ai nuk mund të ishte përfshirë në tentativën e transportit të lëndëve narkotike drejt Greqisë.

A keni tentuar t‘ua parashtroni këto prova autoriteteve të drejtësisë shqiptare dhe nëse po, cila ka qenë përgjigjja që keni marrë?

Qëkur Armandi u arrestua, në qershor 2007, kemi qenë të përqendruar te procesi i ekstradimit. Gjykata këtu nuk merr në konsideratë cilëndo provë të lidhur me krimin e ndodhur jashtë Anglisë. Interesi dhe theksi që kanë vënë dy gjykatat në vendimet e tyre, është një rigjykim i drejtë kur ai të kthehet në Shqipëri. Autoritetet shqiptare e kanë garantuar këtë. Kështu, unë do të kem rast t‘i parashtroj këto prova në gjykatën shqiptare.

Pas këtyre garancive për rigjykimin e bashkëshortit tuaj, besoni se do të jepet drejtësi për të?

Besoj se Armandi do të përballet me një gjyq të drejtë, kur ai të kthehet në Shqipëri, siç edhe kanë premtuar autoritetet. Po, besoj shumë, se pasi të kem paraqitur provat e mia në gjykatë, drejtësia do të fitojë dhe akuzat ndaj tij do të rrëzohen. Kam lexuar shumë raporte. Mjaft njerëz nuk besojnë, apo janë skeptikë në drejtësinë shqiptare, por besoj se gjërat aty janë duke u ndryshuar. Besoj shumë se palët në këtë proces do të punojnë drejt vajtjes në një konkluzion të drejtë për këtë çështje.

Cilat janë pasojat që do të shkaktojë ekstradimi i Armandit për familjen tuaj, duke pasur parasysh se keni një vajzë 13-muajshe?

Pasojat e ekstradimit për familjen tonë do të jenë shkatërruese. Kemi një vajzë 13-muajshe, që për ne është drita e jetës sonë. Ajo ka nevojë për këshillat e babait teksa rritet, për ta informuar për origjinën e tij, në mënyrë që mos të harrojë se nga buron edhe origjina e saj. Unë kam nevojë për këtë bashkëshort që më ndihmoi kur isha në universitet, pa të cilin sot nuk do të quhesha kjo nënë që jam sot.Nuk mund të lejoj që bashkëshorti im të ndahet prej meje për 13 vitet e ardhshme. Për këtë do të luftoj me çdo çmim për pafajësinë e tij. Të jetuarit pa Armandin do ta shkatërrojë shpirtin tim, duke shkaktuar dhimbje tek unë dhe vajza ime, përfshirë një rrjet të gjerë miqsh e shokësh në Angli. Nuk mund të mbijetojmë pa të mes nesh.

Ç‘plane keni pasi Armandi të jetë ekstraduar në Shqipëri?

Planifikoj të udhëtoj drejt Shqipërisë një ditë përpara ekstradimit të Armandit. Jam informuar nga policia se nuk do të më lejohet të jem afër tij ditën kur ai do të ekstradohet. Po ashtu, nuk do të më tregohet se me cilën linjë avioni ai do të udhëtojë. Në të tilla kushte nuk më mbetet gjë tjetër veçse të udhëtoj një ditë përpara për t‘u risiguruar se ndihma ligjore nga avokati që do marrë në mbrojtje atë është imediate dhe eficente. Do të vizitoj burgun ku Armandi do të qëndrojë, për të siguruar se të drejtat e tij elementare nuk janë thyer. Ndërkohë që do të jem në Shqipëri, do të vazhdoj të përpiqem që ai të lirohet dhe kjo çështje e një dënimi të gabuar të mbërrijë në një konkluzion të duhur.

You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Monday, 11 August 2008

Përkthyesja shqiptare, mashtrim mijëra paundësh shërbimeve sociale

Vojsava Stena, e punësuar në një bashki angleze, përfitoi 120000 sterlina si e papunë

Nga Londra
Muhamed Veliu

Një emigrante shqiptare, e cila ishte punësuar si përkthyese në një bashki në veri të Anglisë, do të dëbohet për në Shqipëri, pasi përfitoi përmes mashtrimit 120 mijë paund.
Gjatë procesit gjyqësor u mësua se Vojsava Stena, 27 vjeçe, së bashku me bashkëshortin Altin Fusha, 32 vjeç, kishin transferuar me mijëra paund në disa llogari bankare jashtë Anglisë.
Çifti shqiptar kryente një jetë luksoze, duke përfituar ndihma sociale nga shteti anglez, pavarësisht se kërkesa e tyre për azil ishte refuzuar në vitin 2001, ndërkohë që zonja Stena punonte si përkthyese dhe nuk paguante asnjë lloj takse. Prokurori i çështjes, gjatë gjyqit tha se Vojsava Stena kishte fituar 30 mijë sterlina gjatë pesë viteve të fundit si e punësuar në bashkinë "Northamptonshire", duke mos paguar asnjë lloj takse.

Në mënyrë të padrejtë ajo kishte përfituar 20 mijë sterlina nga ndihmat sociale, tha prokurori. Të dy ata do të dënoheshin me nga nëntë muaj burg pasi pranuan akuzat për përfitime financiare përmes mashtrimit dhe pastrim parash. Ndërsa gjykatësi tha se, meqenëse ata i kishin pranuar akuzat, ky dënim do të konvertohet, me kthimin e tyre në Shqipëri. Gjykatësi Robert Broën, duke lexuar masën e dënimit, i tha çiftit Stena-Fusha se ata ishin përfshirë në një krim serioz, që meritonte dënim me burg. "Marrja e ndihmave sociale të pamerituara është një krim tejet serioz.

Të dy ju keni punuar ilegalisht së bashku, ndërkohë që nuk kishit të drejtë të punonit në këtë vend. Do t‘i rekomandoj ministrit të Brendshëm që të dy ju të dëboheni nga Anglia", tha ai. Altin Fusha dhe Vojsava Stena mbërritën në Angli në vitin 1999, duke u vendosur në qytetin Northampton, ku jeton një komunitet i madh shqiptarësh. Pavarësisht se pas refuzimit të azilit tyre nuk u lejohej marrja e ndihmave sociale, ata vazhduan marrjen tyre duke mashtruar autoritetet, duke pretenduar se ishin të papunë.

Nga hetimet për këtë mashtrim rezultoi se ata i transferonin paratë e fituara përmes mashtrimit në një llogari bankare në Shqipëri dhe një tjetër në Irlandë. Kur aktiviteti i tyre kriminal u zbulua nga policia në mars 2007, çiftit shqiptar iu ngri llogaria bankare. Sipas hetimit rezultoi se në Irlandë, në llogarinë që kishin hapur në një bankë, u gjetën 30 mijë sterlina.

Anglia, hetim të gjithë mashtruesve

Qeveria britanike, përmes organizmit të kontrollit "Liberta" ka filluar hetimin e disa familjeve shqiptare në Angli, të cilat merrnin ndihma sociale në para dhe punojnë ilegalisht. Gazeta "Shqip" ka mësuar se si përmes kontrollit "Liberta" i zbuloi në bankë 60 mijë sterlina, ndërkohë që për çdo muaj, ai bashkëshortja dhe fëmijët merrnin 1800 paund ndihma sociale, përfshirë këtu edhe të paguarit e qirasë e banesës. Kryefamiljari i kësaj familjeje, emri i të cilit nuk bëhet publik për arsye hetimi, gjatë një ore intervistë me oficerët e "Liberta"-s nuk ka dhënë asnjë përgjigje se si i kishte fituar 60 mijë sterlinat e depozituara në bankë.

Ai supozohej të paraqitej në një intervistë të dytë me avokatin e tij, por nuk e ka bërë një gjë të tillë. Tani çështja i ka kaluar për hetim policisë. Megjithëse që të gjitha familjet shqiptare përfituan leje qëndrimi të përhershme në Angli nga amnistia e vitit 2003, shumica e tyre vazhdojnë të "zhvatin" sistemin e shërbimeve sociale.

Autoritetet britanike shpresonin se me legalizimin e tyre dhe më pas fitimin e nënshtetësisë britanike, familjet e emigrantëve shqiptarë do t‘i përvisheshin punës, por në fakt, nuk ndodhi kështu.
Shumica e pjesëtarëve të këtyre familjeve punojnë ilegalisht dhe në krahun tjetër vazhdojnë të marrin me mijëra paund ndihma sociale në vit.

You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Sunday, 10 August 2008

Sa shumë e dua... Shqipërinë

Sa shumë e dua... Shqipërinë

Shqipëria dhe Kosova, në objektivin e fotografit Robert Hackman

Nga Londra
Muhamed veliu


Për të realizuar një fotografi të mirë, kërkohet sigurisht një sy prej artisti, por që ajo të dalë perfekte, kërkohet një kujdes i veçantë, dashuri, pasion, të ndjesh keqardhje për atë që je duke fotografuar. Vetëm kështu fotoja është gati për të dëshmuar çastin, për të dokumentuar atë që ishte kur koha ndali në një shkrepje. Këtë provon edhe Robert Hackam, fotografi britaniko-australian, i cili me fotot e realizuara në Shqipëri e Kosovë provoi të tregonte gjithë sa pa e njohu në këto dy vende, me një histori kaq komplekse. Sepse fotografia është një dëshmi e madhe, dëshmi të cilën Robert Hackman tentoi ta sillte ndryshe.

Robert Hackman ka zgjedhur të prezantohet ndryshe. Ai preferon një tjetër mënyrë të fotografuari. Rob (kështu e thërrasin shkurt) ka zgjedhur të shikojë të bukurën, realen. Ai kështu dëshiron t‘ia prezantojë botës krijimet e tij. Rob zgjedh të përcjellë anën humane të shoqërisë. Në fotot e Robertit personazhet, ata që vuajnë, janë shpesh edhe më kurajozët. Ai i sjell ata të fortë, gati të përballojnë të gjitha vuajtjet. Sipas Hackman-it, fotoja duhet t‘i përgjigjet shprehjes së famshme "një foto vlen njëmijë fjalë". Kështu ajo tregon se sa e vërtetë është.Robert gjithnjë ka për të treguar mbi Shqipërinë e Kosovën e nuk rresht së foluri për këto vende. Ai flet me aq pasion për Shqipërinë dhe Kosovën, shqiptarët e këtyre dy shteteve, sikur të kishte lindur aty. Ai ka vizituar e fotografuar shumë vise shqiptare gjatë shtatë viteve të fundit... Sa shumë? As atij nuk i kujtohet. Sa shumë kujtime nëpër Shqipëri, gjithnjë i shoqëruar nga aparati fotografik, gjithnjë duke fiksuar imazhe e personazhe... Sa shumë detaje Shqipërie e Kosove. Në secilën prej tyre ai është një histori më vete, në secilën prej tyre gjen mesazhin njerëzor. Atje është bota njerëzore që i intereson, është ajo që Roberti kërkon të njohë më thellë. Këtë ka synuar kudo ku ka shkuar.

Ai asnjëherë nuk i thotë jo një ftese për të biseduar mbi Shqipërinë dhe dashurinë që lindi për të. Nuk më refuzon. Takohemi në rrugën "Oxford". Së bashku zgjedhim të ulemi në një bar kafe, e cila ndodhet në katin e 13-të të një hoteli. Prej këtej, Londra shihet si në pëllëmbë të dorës. Ai nuk i ndahet dot së bukurës, e kërkon atë kudo qoftë, edhe në një bar kafe. Këtu biseda rrjedh natyrshëm... "Shqipëria për mua nuk ishte një vend fare i panjohur. Kur isha fëmi, në dhomën time të gjumit kisha një hartë të madhe të botës. Kam pasur gjithnjë kureshtje të njihem me vende të ndryshme e nëpërmjet kësaj harte u njoha me shumë prej tyre, kështu ndodhi edhe me Shqipërinë, sepse kisha studiuar të gjitha vendet e Evropës". Megjithatë, për herë të parë në Shqipëri ai mbërriti në vitin 2001, si i dërguar nga Organizata e Kombeve të Bashkuara për të fotografuar largimin nga Shqipëria të refugjatëve të luftës së Kosovës. Organizata në fjalë i besoi Robertit dokumentimin përmes fotove të gjurmëve që kishte lënë te këta viktima të luftës jo vetëm konflikti, por dhe realiteti i ri me të cilin do të përballeshin pas tij.

Do të ktheheshin në Kosovë për të ndërtuar gjithçka nga e para. Si do të ishte reagimi? Fotot e Robert Hackman-it do të arkivoheshin në arkivin e Kombeve të Bashkuara në Gjenevë."Pas disa mesazheve me përfaqësues të OKB-së në Tiranë, gjithçka ishte gati për udhëtimin tim drejt Shqipërisë. Dita e parë në Tiranë për mua nisi me takimin në aeroport me një punonjëse të OKB-së, Mariola. Tani ajo është bashkëshortja ime", kujton ai. "Pashë njerëz gjithë energji dhe kjo më bëri të ndihem shumë mirë. Kuptova që shqiptarët ishin njerëz të cilëve nuk u kishte humbur shpresa dhe kjo përcillte tek unë një atmosferë vërtet pozitive. Pavarësisht të gjithave, ky pozitivitet ndihej ngado. Për mua Tirana ishte vërtet tërheqëse, e zhurmshme, e ndryshme nga qytetet e tjera nëpër botë, me të cilat isha njohur më parë", thotë Robert për ditën e parë në kryeqytetin shqiptar.Për Robert, projekti i realizimit të fotove ishte një mision disi i vështirë, pasi në Shqipëri kishin mbetur shumë pak refugjatë lufte. Shumica kishin lënë kampet ku kishin qëndruar dhe ishin kthyer në Kosovë. Sipas tij, për një fotograf është e lehtë të fotografojë pamje klishe, apo mizorie të njerëzve të kthyer në refugjatë si pasojë e luftës. Por ai që në fillim të këtij projekti donte të tregonte anën tjetër të medaljes. Përpjekjet e këtyre njerëzve në ndërtimin e jetës së re, duke lënë kampet e refugjatëve ku kishin jetuar. Kjo është edhe vështirësia.Megjithatë ai mundi t‘ia arrinte qëllimit. Pas disa javëve qëndrim në Shqipëri, duke vizituar njëri pas tjetrit qytetet shqiptare, fotografitë "Made in Albania" përcillnin shpresë.

Ato i tregonin botës se për shqiptarët e Kosovës jeta vazhdonte. Ata kishin gjetur një strehë të ngrohtë në Shqipëri. Fotot e Robert Hackman-it u ekspozuan në selinë qendrore të Kombeve të Bashkuara në Gjenevë, ndërsa u prezantuan edhe në Tiranë, pranë zyrave të OKB-së. "Ekspozimi i fotove u prit mirë", thotë Robert, duke shtuar se ato tregonin anën pozitive të shqiptarëve të Kosovës. Kjo reflektohej në çdonjërën prej tyre."Unë dallova shumë shpresë tek ata njerëz që takova. Këtë shpresë që gjeta mes tyre kërkova ta ndieja përmes fotove të mia. Besoj se ia arrita qëllimit dhe kjo më bën shumë të lumtur", shprehet Rob rreth misionit të parë në Shqipëri... Por ky nuk ishte i fundit.Eksperienca interesante dhe e suksesshme bëri që fotografi të tundohej për t‘u kthyer sërish në Shqipëri. Vizita e parë e Robert Hackman do të ishte vetëm fillimi i asaj që ai tani e përshkruan si një dashuri për Shqipërinë përmes objektivit të aparatit fotografik, madje edhe si një adhurim për vendin e origjinës së bashkëshortes Mariola, me të cilën ai ka ndërtuar një jetë të lumtur. Robert nuk donte aspak që subjektin e refugjatëve nga Kosova ta quante një kapitull të mbyllur. Ai tregon se ka udhëtuar drejt Kosovës, duke hyrë atje nga pika të ndryshme kufitare, duke fotografuar të rikthyerit nga kampet e refugjatëve në Shqipëri. E ka ende të freskët momentin kur iu desh të përdorte pasaportën australiane për të hyrë në Kosovë.

"Unë kam dy pasaporta. Atë britanike, përfshi edhe atë të origjinës, australiane. Pas konfliktit në Kosovë, serbët ishin ende të inatosur me britanikët. Vendosa që herën e fundit të fotografoja në veri të Kosovës, duke hyrë nga një pikë kufitare serbe. M‘u desh t‘u tregoja pasaportën australiane policëve në këtë pikë kufitare dhe ata më lanë të hyja lirshëm në Kosovë". Për Robertin, Kosova është një vend që të ofron shumë për të fotografuar, dhe ai nuk është i vetmi që e ka "shfrytëzuar" kësisoj.Hackman flet me shumë respekt për punën që kolegët e tij kanë bërë para dhe pas konfliktit, duke i treguar botës realitetin e panjohur të këtij vendi që aspironte për liri. "Do ta quaja epike punën e fotografit Andry Testa. Ai është një shembull i rrallë. E kam takuar disa herë. Imazhet e Testës janë me të vërtetë të fuqishme dhe me siguri që do t‘i rezistojnë kohës", vijon rrëfimin Rob. Por edhe komuniteti rom në Shqipëri ka qenë një tjetër temë që britaniku e ka përcjellë nëpërmjet imazheve. Shpeshherë të përbuzur, të vuajtur e të trajtuar si shtresa më e ulët e shoqërisë shqiptare, por krenarë e punëtorë. Për të gjitha këto arsye Robert tregon se ka shumë respekt për romët. Ai i quan romët shqiptarë si pionierë të ndërtimit të industrisë së riciklimit në Shqipëri.

Kjo ka bërë që ata të jenë kaq të pëlqyer nga ai. "Ata janë një shembull tipik i atyre njerëzve që shkëlqejnë përballë vuajtjes. Ata nuk kanë asgjë, por janë të lumtur dhe shpeshherë kthehen në objekt paragjykimi. Duke fotografuar ata dhe pasqyruar jetën e këtij komuniteti, kam dashur të kontribuoj në zhdukjen e paragjykimit ndaj tyre. Është një projekt që ende vazhdon", thotë Rob, tashmë një personazh i njohur dhe shumë miqësor për romët e Tiranës. Një tjetër aspekt që e ka intriguar atë të fotografojë romët ka të bëjë me punën e tyre si mbledhës të mbeturinave për t‘u ricikluar. Ai me të drejtë i quan ata si një pjesë e rëndësishme e industrisë së riciklimit në Shqipëri, duke premtuar se në udhëtimin e ardhshëm në Tiranë përsëri do të ndjekë nga afër jetën e komunitetit rom, parë në aspektin kontribuues që ata japin në shoqërinë shqiptare. Madje ai shton se kjo duhet parë edhe në këndvështrimin global, pasi dita-ditës çështja e riciklimit, që lidhet me mbrojtjen e planetit, është temë dite në kancelaritë e politikës botërore dhe axhendën e politikanëve.Krahas fotografimit të romëve, Robert do të jetë në Shqipëri gjatë muajit gusht për një tjetër projekt ambicioz, mbi të cilin nuk jep shumë detaje, por thotë se do të mirëpritet, madje që tani ka ngjallur interes për t‘u ekspozuar në disa vende të botës."Do të shfrytëzoj bregdetin shqiptar për të shkrepur foto. Ai është ideal për t‘u fotografuar. Kështu, një rrugë e dy punë.

Kam bindjen se projekti më i ri me foto nga Shqipëria do të pëlqehet", deklaron Robert. Përgëzimet dhe inkurajimi për këtë projekt nuk kanë munguar nga të interesuarit. Një regjisor shqiptar e ka quajtur si një ide brilante, e cila përveç anës artistike do të ngjallë interes për Shqipërinë dhe si pasojë shtimin e numrit të vizitorëve që do të duan ta vizitojnë.Nuk ka dyshim që edhe ky projekt, i fotografit Robert Hackman, tashmë më shumë se një mik i shqiptarëve, do të rezultojë i suksesshëm. Kjo është vetëm çështje kohe.

You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Sunday, 3 August 2008

“Çmenden” kompanitë airore

"Shqip" investigon çmimet e biletave Londër-Tiranë. Shqiptarët paguajnë dy herë më shumë se bullgarët, rumunët, serbët e grekët

Nga Londra
Muhamed Veliu

Emigrantët shqiptarë në Angli, të cilët vijnë për pushime në Shqipëri, detyrohen të paguajnë për biletat e avionit çmime dy herë më të shtrenjta se fqinjët e tyre.
Sikurse në sezonet e tjera të verës apo për Krishtlindje, çmimi biletave për linjat direkte Londër-Tiranë e anasjelltas, edhe këtë vit, është dyfishuar. Nuk bëjnë përjashtime nga rritja e çmimeve edhe linjat jo direkte. Një situatë e tillë ka detyruar me qindra emigrantë që të vijnë në Shqipëri me automjetet e tyre, duke bërë një udhëtim rraskapitësh për dy ditë. E gjitha kjo për shkak të biletave të avionit, çmimet e të cilave janë rritur jo pak dhe thuajse janë të papërballueshme, për më tepër kur bëhet fjalë për familje me dy ose tre fëmijë. Të tilla çmime kanë ndikim katastrofal në thithjen e turistëve britanikë. Me ato para që atyre u duhet të paguajnë për bileta avioni drejt Shqipërisë, vende si Spanja, Greqia, Italia apo Kroacia ofrojnë paketa turistike 10-ditore ku përfshihet bileta e avionit, së bashku me akomodimin dhe mëngjesin falas.

Investigimi

Nga një investigim i "Shqip" për këtë çështje rezulton se, një emigrant shqiptar paguan vetëm për biletën e avionit dy herë më shumë se bullgarët, rumunët, serbët dhe grekët. Nëse gjatë muajve të tjerë të vitit, një biletë Londër-Tiranë varion nga 200 deri në 270 paund, në sezonin e verës çmimet shkojnë deri në 800 paund për person. Por sa reale janë ankesat e emigrantëve shqiptarë në Angli, të cilët biletat e udhëtimit për në vendlindje i kanë temë dite në bisedat e tyre? Falë sistemit të prenotimit të biletave nëpërmjet internetit, për disa ditë me radhë, "Shqip" ka monitoruar disa kompani ajrore, duke parë po ashtu edhe biletat e linjave direkte dhe jodirekte që fluturojnë nga Londra për në Sofje, Beograd, Bukuresht dhe Athinë dhe duke i krahasuar çmimet e tyre me atë të një bilete për në Tiranë.
Zgjodhëm këto vende për afërsinë në distancën e tyre me kryeqytetin britanik. Kështu, Londra është larg Shqipërisë 1174.27 milje, Sofja 1250.67 milje, Beogradi 1049.50 milje, Bukureshti 1297.72 milje dhe Athina 1484.63 milje. Duket qartë se distanca e largësisë me Londrën është pak a shumë e njëjtë, përjashtuar Athinën, ku largësia është 3 mijë milje më shumë.

Linjat direkte

Për të vërtetuar ankesat e emigrantëve se atyre "po u pihet gjaku" nga kompanitë ajrore, ndërmorëm këtë investigim, duke kontrolluar nëpër faqet online të kompanive dhe duke krahasuar fillimisht çmimet për linjën direkte që ofrojnë nga Londra për në Tiranë, Sofje, Beograd, Bukuresht dhe Athinë. Fillimisht kërkuam për një biletë me datë nisjeje 27 korrik dhe kthim 27 gusht me linjën direkte nga aeroporti "Gatwick" drejt Tiranës. Përgjigjja që morëm nga kërkimi elektronik është se bileta vajtje-ardhje me datat e kërkuara do të na kushtojë 821 sterlina, një shifër përafërsisht tri herë më e madhe se gjatë muajve të tjerë të vitit. Por, nëse një bullgar do të kërkonte të blinte një biletë me nisje 27 korrik dhe kthim 27 gusht po me të njëjtën linjë ajrore sa do të paguante? Çmimi që na ofrohet është 307 sterlina, pavarësisht se distanca Londër-Sofje është 768 milje më shumë se ajo Londër-Tiranë. Surprizat për çmimet e biletave "të kripura" ekskluzivisht për shqiptarët nuk mbarojmë këtu. Fqinjët tanë serbë, nëse udhëtojnë nga Londra për në kryeqytetin e tyre, Beograd, me po të njëjtën linjë, në po të njëjtën datë, do të paguanin vetëm 333 sterlina.
Çmimeve të lira për në vendlindjen e tyre mund t‘u gëzohen edhe rumunët e shumtë që jetojnë dhe punojnë në Londër. Një kthim në vendlindje atyre u kushton 343 sterlina. Nuk bëjnë përjashtim edhe grekët, të cilët për datën e zgjedhur nga ne, bileta do t‘u kushtonte 477 sterlina sa gjysma e biletës që të çon në Tiranë, pavarësisht se distanca Londër-Athinë është 3.100 milje më shumë se ajo Londër-Tiranë.
Bëjmë edhe një kërkim tjetër, duke dashur të prenotojmë një biletë me të dhëna të tjera. Si datë nisjeje nga Londra për në Tiranë vendosëm datën 10 gusht që përkon me një numër të madh shqiptarësh që kthehen në vendlindje gjatë këtij muaji dhe kthim 6 shtator. Faqja online e një kompanie për këtë kërkim na ofron biletën me çmimin 671 sterlina. Me të njëjtën datë kërkojmë edhe vendet tona fqinje. Është po e njëjta histori. Çmime po prapë të lira, krahasuar më Shqipërinë. P.sh. për në Sofje, bileta kushton 364 sterlina, për në Beograd 375, për në Bukuresht 290 dhe për në Athinë 274.
Kompania britanike "British Airways" së bashku me "Albanian Airlines", janë të vetmet që fluturojnë direkt drejt Tiranës. Kompania shqiptare "Albanian Airlines" fluturon vetëm gjatë tre muajve të verës korrik, gusht dhe shtator. Po ashtu, edhe gjatë muajve të fundvitit nëntor e dhjetor.Gusht dhe Shtator po ashtu edhe fjatë muajve të fundvitit Nëntor Dhjetor.Duke mos patur mundësi të prerjes së biletave online për këtë kompani telefonuan një prej agjencive të cilat shet biletat e saj. Bileta për datën e nisjes 10 Gusht dhe kthim 6 Shtator me këtë kompani rezultoi të jetë 470 stërlina.

Linjat jodirekte

Duke parë një fluks të madh kërkesash për bileta nga Anglia drejt Shqipërisë nuk bëjnë përjashtim në çmime edhe linjat jodirekte. Diferenca mes tyre dhe atyre direkte nuk është e madhe. Edhe këto linja rezulton se ofrojnë çmime dy herë më të shtrenjta për shqiptarët që udhëtojnë nga Londra për në Tiranë me një tranzit të vetëm krahasuar me fqinjët tanë. Nga një kërkim në faqen online të një kompanie italiane për datën 10 gusht nisje dhe me kthim 6 shtatorin (drejt Tiranës) çmimi është 509 sterlina. Ndërsa për të shkuar në Sofje po në këtë datë, çmimi që ofrohet është 340 sterlina, për në Beograd 360, për në Bukuresht 328 dhe për në Athinë 399 sterlina.
Të zymta janë edhe çmimet që ofron për shqiptarët edhe një kompani fluturimi austriake. Një biletë Londër-Vjenë-Tiranë të ofrohet me çmimin 537 sterlina, ndërkohë që një biletë drejt Sofjes është 332 sterlina, 360 sterlina për në Beograd, 351 sterlina për në Bukuresht dhe 462 për në Athinë. Aspak ndryshe nuk është as panorama e çmimeve me një kompani hungareze, linjë e frekuentuar shumë nga shqiptarët për vetë orarin e volitshëm që ajo ka. Kjo kompani u ofron atyre çmimin prej 625 sterlinash, ndërsa bullgarëve çmimin 382 sterlina, rumunëve 382 sterlina, grekëve 377 sterlina.

Kompanitë

Kompanitë ajrore kanë një sistem të veçantë për shitjen e biletave. Bëhet fjalë për ndarjen e vendeve në disa kategori. Kjo lidhet ngushtë me çmimin e biletave. Një punonjëse pranë një zyre për shitje biletash tregon mekanizmin e këtij sistemi. Sipas saj, në kategorinë e parë, që njihet si "Red Tickets", vendosen disa vende me çmim të lirë, në kategorinë e dytë "economy" çmimet fillojnë të rriten dhe pjesa tjetër që mbetet përfshihet në kategorinë e biletave "economy flexible", të cilat shiten me çmim maksimal kundrejt kërkesës dhe ofertës. "Ky është një mekanizëm kundrejt të gjitha ligjeve të cilin e aplikojnë kompanitë ajrore. Ajo që nuk dihet ka të bëjë me numrin e vendeve që përfshihen në ‘Red Tickets‘ nga ku edhe nisin çmimet", thotë punonjësja. Rritjen e çmimeve gjatë sezonit të verës ajo e konsideron si të lidhur ngushtë me kërkesën e madhe për bileta nga shqiptarët, gjë që në ekonominë e tregut përdoret maksimalisht nga kompanitë ajrore për të përfituar.

Reagimi Emigrantët: Faji, i kompanive ajrore

Përballë kësaj situate, ku çmimet janë shtrenjtuar në maksimum, emigrantët shqiptarë fajësojnë kompanitë ajrore, duke i akuzuar ato se kërkojnë të përfitojnë nga fakti se ata gjatë verës tradicionalisht kthehen me pushime në vendlindje.
Ilir Krasniqi, një emigrant shqiptar në Londër, thotë se të tilla çmime në stratosferë po na detyrojnë që në vitet e ardhshme të mos i bëjmë pushimet në Shqipëri. "Të blesh një biletë 800 paund është shumë, pasi me ato 800 paund i kalon 10 ditë pushime për bukuri në ndonjë vend tjetër. Kështu është kur nuk u tërhiqet veshi kompanive ajrore, duke i detyruar të mos bëjnë ç‘t‘u dojë qejfi me çmimet e biletave", pohon ai.
Të njëjtin shqetësim ndan edhe Brikena Omari, studente në universitetin "Middlessex" të Londrës, në degën e menaxhimit të biznesit.
Ajo thotë:
"Nuk e kuptoj përse ndodh kjo vetëm për ne, shqiptarët. Të gjitha linjat ajrore në përgjithësi për ne shqiptarët ofrojnë bileta me çmime të shtrenjta. Unë kontrolloj shpesh biletat për të vajtur nga Londra në Shqipëri dhe gjithmonë çmimi është më i shtrenjtë nga çdo vend tjetër në rajon në të njëjtën periudhë".


British Airways
Tiranë 671 paund
Sofie 364
Beograd 375
Bukuresht 290
Athinë 274

Alitalia
Tiranë 509 paund
Sofie 340
Beograd 360
Bukuresht328
Athinë 399

Austrian
Tiranë 537 paund
Sofie 332
Beograd 351
Bukuresht 355
Athinë 462

Malev
Tiranë 625 paund
Sofie 382
Beograd nuk fluturon (Shkup 466)
Bukuresht 382
Athinë 377

You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Saturday, 2 August 2008

Brighton, gjashtë vite burg agresorit shqiptarë

Gazmir Meta brënda një nate rrahu një anglez e plagosi me thikë një tjetër

Nga Londra
Muhamed Veliu

Një emigrant shqiptarë në Angli i cili brënda një nate u përfshi në dy incidente të dhunëshme, duke rrahur një britanik e ngulur thikën një tjetri është dënuar me gjashtë vite burg
.
Gazmir Meta, 30 vjeç ish punonjës në një fastfud ku tregtoheshin patate të skuqura dhe peshk, është gjetur fajtor për dy sulme të dhunshme ndaj personit pas një procesi gjyqësor që zgjati pesë ditë në ngjykatën Brighton Crown Court.Të dy incidentet ku u përfshi emigrant shqiptarë i cili jetonte ilegalisht në Angli ndodhën më 27 Maj 2007 në fastfudin “Buddies Plaice” me adresë Kings Road, Brighton, ku ai edhe punonte.
Prokurori çësthtjes i tregoi gjykatës se në 17 Maj 2007 Lee Hewison sëbashku me një mik shkuan për të blerë ushqim në lokalin “Buddies Plaice”.
Ata ishin shumë në qejfë dhe sjellja e tyre ishte disi e papëlqyshme.
Menjëherë pasi kanë dalë nga lokali Meta i ndoqi ata në rrugë duke goditur me grusht Lee Hew
wison.
Anglzei 23 vjeçar ka rënë në rrugë pa ndjenja, ndërsa Meta është rikthyer në vëndin e punës qetësisht.
Po atë natë një tjetër djalë i ri i quajtur Rafel Salaciak sëbashku me miqtë e tij shkuan tek lokali ku ishte i punësuar shqiptari, edhe ata për të blerë patate të skuqura me peshk.
Një zënkë është shënuar mes tyre dhe Gazmir Metës brënda lokalit për të vazhduar jashtë në rrugë.
Meta do ti ndiqte me një thikë në dorë të cilën e mori nga lokali. Me t’ju afruar atyre goditi njeherë poshtë barkut Rafel Salaciak duke e lënë atë të mbuluar nga gjaku.
Meta do të rikthehej për pak kohë në punë dhe është larguar për ti shpëtuar kapjes nga policia.
E gjithë zona është bllokuar duke përfshirë mbylljen e lokalit.
Ai do të kapej pas disa ditëve nga mbrëmja kur ndodhi incidenti.
Agjenti departamentit te krimeve “CID” për zonën e Brighton DC Chris Hike tha se këto dy krime u ndërmorrën nga Meta duke u sjellë në mënyrë të dhunëshme e shkaktuar dy viktima.
“Meta është një individ shumë i rrezikshëm i cili padyshim duhet të mbyllet në burg.” ka shtuar hetuesi britanik.
Emigranti shqiptarë edhe në të shkuarën është përfshirë në incidente të ngjashme në zonën Leicestershire. Pas përfundimit të gjashtë viteve burg ai do të dëbohet për në Shqipëri.

You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Anglia rikthen në burg Afrim Sinanin

Gjykata dritë jeshile Shqipërisë për të ektraduar të arratisurin nga burgu në 1997.

Nga Londra
Muhamed Veliu

Një gjykatës britanik e ka quajtur të drejtë kërkesën e drejtësisë shqiptare për të ekstraduar një shqiptarë i dënuar për vrasje i cili u arratis nga burgu Bënçës në 1997.

Gjykatësi Anthony Evans në vendim prej 14 faqesh në çështjen e ekstradimit të Afrim Sinanit thotë se nuk gjen asnjë pengesë për të refuzuar kërkesën e ekstradimit nga shteti shqiptarë të këtij personi në arrati. Sipas ligjit ai ja ka dërguar çëshjtjen për veprime të mëtejshme sekretares së brendëshme të shtetit Jacque Smith për të fimosur çertifikatën e ekstradimit.“Pasi sekretarja e brendëshme të ketë firmosur çertifikatën e ekstradimit ju keni të drejtën e apelit” ka thënë gjykatësi dukeju drejtuar Sinanit që shpresonte për një vendim në favor për mos t’u ekstraduar.Sinani 33 vjeç, baba i katër fëmive, kërkohet nga drejtësia shqiptare për të përfunduar dënimin prej 20 vite burg të lënë në mes pas largimit nga vëndi dënimit në vitin 1997Gjykata e Kukësist e më 29 Tetor 1996 e gjeti atë fajtor për vrasjen e Naim Sinanit ndodhur më 4 janar 1996.Pas një pune intensive të Interpol Tiranës Afrim Sinani do të lokalizohej në zonën Ilford në Lindje të Londrës. Informacioni Interpol Tiranës dërguar zyrës së ekstradimeve në Scotland Yard çoi në arrestimin e shqiptarit “ëanted” më 19 Dhjetor 2006” pas 9 vitesh në arrati.Pamvarësisht se persion në kërkim ndërkombëtar nga Interpoli ai kishte mundur të fitonte në vitin 2004 leje qëndrimi për gjithmonë në Britani dhe dy vite më pas shtetësinë britanike nën emrin Afrim Pulaj nga qyteti Prizrenit në Kosovë.

Vendimi

Gjykatësi britanik pasi ka dëgjuar dëshminë e Afrim Sinanit dhe avokates Drita Veliu e cila e mori në mbrojtje gjatë procesit në gjykatën e Kukësit ka arritur në përfundimin se ai nuk është një dëshmitarë i besueshëm. Sipas gjykatësit Anthony Evans në paragrafin e fundit në faqen 2 të vendimit parashtron dy varjante të ndryshme pohuar nga Sinani se ai nuk është arratisurt nga burgu por u amnistua nga shteti. Edhe dëshmia e zonjës Veliu dërguar me shkrim thotë se si pasojë rrëximit të shtetit policia hapi burgjet por nuk përmend fjalën aminsti siç pretendonte ish klienti i saj Afrim Sinani.Që nga ky moment gjykatësi në faqen 3 të vendimit e cilëson Afrim Sinanin si dëshmitarë jo të besueshëm duke i rreshtuar një mori me gënjeshtra deklaruar në gjykatë.Edhe dëshmija e bashkëshortes së Sinait nuk ka rregulluar punë. “Pasi është kthyer nga Kosova zonja Sinani tha në dëshmi se krahas kurimit të djegieve në trup dhe krah ajo ishte në koma. Që ajo ishte në koma kurrë nuk është përmendur nga zoti Sinani” shkruan gjykatësi Evans.Vendimi vijon duke saktësuar se Afrim Sinani është një person në arrati i cili ka ndërtuar një identitet të ri duke e ditur fare mirë se ai ishte i kërkuar nga drejtësia shaqiptare.Pasaktësitë në dëshmitë e Sinanit sipas gjykatësit vijojnë.Ai nuk është pajtuar me dëshminë e shqiptarit që tha se nuk ishte ishte prezent në gjykatën e Kukësit gjatë procesit dhe kur mori masën e dënimit.Dokumentat e ardhura nga Tirana mes tyre një letër me shkrimin e dorës së Sianit ku ai pranon se e ka kryer vrasjen kanë bindur gjykatësin se ai ka qënë prezen në sallën e gjygjit.Poshtë është hedhur edhe një fragment dokumentari prodhuar nga TVSH për të cilin afrim Sinani tha se ai është parë në televizion dhe pëse nuk është arrestuar atë kohë.“Policia ishte në ndihmë të rrefugjatëve të luftës dhe nuk mund të dallonte se mes rrefugjatëve të luftës ishte një person i kërkuar, pamvarsisht se fytyra e tij u shfaq për pesë sekonda” thotë gjykatësi.Duke shqyrtuar dëshmitë kontradiktore të Sinanit gjykatësi i ka dhën fund eceakjeve të këtij procesi ekstradimi që zgjati gati dy vjet duke lejuar ekstradimin e Afrim Sinanit në Shqipëri për të vazhduar kryerjen e 20 viteve burg.

You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

About Me

Veliupress


View My Stats