Tuesday, 29 January 2008

Britanikët e duan Ermonelën

Britanikët e duan Ermonelën

Rrëfimi i sopranos që mahniti mijëra spektatorë në Operën Mbretërore të Londrës

Nga Londra
Muhamed Veliu

Për publikun britanik deri një javë më parë sopranoja Ermonela Jaho ishte një emër i panjohur. Kur Piter Catona drejtor i "Royal Opera House" në Londër doli përpara 2500 spektatorëve duke anonçuar se rolin e Violetës në "La Traviatën" e Verdit nuk do ta interpretonte siç pritej, sopranoja Anna Netrebko për arsye shëndetësore, por një shqiptare, një lajm i tillë do t‘i befasonte të gjithë. Emri zëvendësues i ruses, Netrebko, ishte Ermonela Jaho e cila kishte udhëtuar nga Nju Jorku duke mbërritur në këtë opera vetëm dy orë përpara shfaqjes. Kaq u desh që në sallë të nisnin pëshpërimat, mërzitja deri diku zhgënjimi të cilat shqiptarja do t‘i shuante shumë shpejt. E ndërsa publiku ishte vënë në siklet pasi vallë a do të mundte sopranoja shqiptare të zëvendësonte me dinjitet sopranon Netrebko me një pamje shumë të bukur dhe flokë bionde, prapa perdes ku priste Jaho i dukej vetja sikur bota po i lëvizte nën këmbë. Kishte të drejtë. Ishte përballë një prove jashtëzakonisht të madhe nga e cila deri diku varej edhe karriera e saj e ardhshme të paktën nëse synonte rikthimin në "Royal Opera House". Se çfarë ndodhi atë natë ku pa asnjë lloj prove, pa njohur aktorët e tjerë ajo u ngjit në skenën e kësaj opere mbretërore për herë të parë ekskluzivisht për "Shqip" Ermonela Jaho e rrëfehen me detaje. Ka disa momente që ka mbaruar shfaqja e radhës. Me shpejtësi ajo fshin nga fytyra grimin, ndërkohë një nga producentët i tregon se jashtë operës te hyrja e artistëve një turmë njerëzish presin të marrin autografe prej saj. Pasi ka mbaruar rituali i dhënies së autografeve, madje edhe fotografimit me disa prej adhuruesve të saj të rinj, ulemi për një kafe në Somerset House buzë lumit Tamiz. E lodhur, por e gëzuar nga një tjetër sukses sopranoja 33-vjeçare thotë se në Londër e planifikonte të vinte më vonë. Por kjo ardhje ishte tejet e papritur. "Royal Opera House" është një nga operat më të rëndësishme në botë. Të interpretoja/ këtu ishte një ndër arritjet e mia. E kisha parashikuar pak më vonë jo kaq shpejt. Fati që nuk parashikohet asnjëherë më dha këtë mundësi. Emocionet kanë qenë të jashtëzakonshme, pasi erdha në mënyrë shumë të papritur, pa prova, pasi mendoja se deri në momentin e fundit do të këndonte kolegia ruse. Lajmin që do të këndoja ma dhanë sapo shkela në aeroportin "Gatwick", nis të rrëfejë Jaho. Sipas saj, kur ka mbërritur në "Royal Opera House" i dukej vetja si një robot, e mpirë nga emocionet. Gjithçka do të ndryshonte kur drejtori i kësaj opere ka përmendur origjinën e sopranos Jaho, e cila kishte zëvendësuar "yllin" e asaj nate sopranon Netrebko. Rreth këtij momenti Ermonela thotë: "Nisa të dridhem. Më dukej sikur kisha harruar fjalët. Nuk më kujtohet asgjë. Ku jam duke shkuar, si e mora këtë guxim, kurajë…. por nuk kishte kthim prapa. Ankthin tim e shtuan edhe pëshpëritjet e publikut që kishin ardhur të dëgjonin Anna Netrebkon, e cila është e famshme në Londër. Kur hyra në skenë e ndieja ftohtësinë e publikut, madje deri atje sa kostumi që kisha veshur për këtë rol më dukej 10-fish më i rëndë se pesha normale. Mezi merrja frymë. Salla më dukej shumë e madhe, nuk po orientohesha të gjeja të dashurin e Violetës që është Alfredo, një nga rolet kryesore të "La Traviatës". Kështu fillova të interpretoja frazë pas fraze, duke parë publikun që pas ç‘do dueti duartrokisnin". Kaq është dashur për Jahon, e cila më pas ka dashur t‘i injektojë atij publiku që e priti me zhgënjim pasionin, gjaknxehtësinë që ka shqiptari që në art është një thesar i vërtetë duke përcjellë emocion. Më pas, gjithçka për Jahon ka qenë një normalitet me alternimin në mënyrë perfekte me aktorët e tjerë për tri aktet e operës që ka zgjatur më shumë se tri orë. Në fund lot, jo lot të detyrueshëm nga vdekja Violetës siç e kërkon skenari, por lot gëzimi. Ermonela Jaho ia kishte dalë mbanë provës më të rëndësishme në karrierën e saj të interpretimit tejet spontan në "Covent Garden" ku ndodhet kjo operë duke shkrirë ftohtësinë e akullt të publikut anglez. Ishte pikërisht ky publik që do të ngrihej i tëri në këmbë duke e rikthyer Jahon disa herë në skenë për t‘i përshëndetur ata si pasojë e duartrokitjeve të pafundme. E njëjta skenë do të përsëritej për tre net me radhë në atë skenë ku kanë kënduar e duartrokitur emrat më të mëdhenj të operës botërore, tashmë mes tyre një shqiptare që linte gjurmët e saj sikurse dy bashkëkombësit e saj, Inva Mula dhe Sajmir Pirgu, po në të njëjtën skenë. Përballë njerëzve që duartrokisnin derdhnin lot apo bërtisnin "bravo bravo", Ermonela Jaho thotë se nuk e besonte që ia kishte dalë mbanë kësaj sfide apo aventure pak rëndësi ka emri. "Isha krenare që unë si shqiptare arrita diçka në këtë skenë, pasi është diçka që nuk ndodh përdit", thotë Ermonela. Ajo ka më se të drejtë, por nuk fsheh pezmatimin që në atë shfaqje të kishte shqiptarë disa, prej tyre ku edhe ambasadorit Zef Mazi ajo i kishte nisur bileta falas për ta parë bashkëkombësen e tyre. Pas të gjithë këtij rrëfimi emocionues pyetja se çfarë dyersh të tjera hapi ky sukses për të në Londër është më se i natyrshëm. Tashmë emri i shqiptares Jaho u bë i njohur, bëri zhurmë, kritikët shkruan disa shkrime për interpretimin e saj që pa dyshim është një arritje më vete. Ky sukses do të përkthej me fitimin e disa kontratave të tjera për të ardhur përsëri në Londër. Nuk kishte si të ndodhte ndryshe. Drejtori "Royal Opera House" pas gjithë atij suksesi të shqiptares së imët me zë brilant do të bënte vetëm një pyetje. Ermonela kur do të vish përsëri në operën tonë. Përgjigjja e saj ka qenë shumë sinjifikative. "Me kënaqësi, më lër të shikoj ditarin". Jaho do të rikthehet gjatë vitit në vazhdim në Londër me operën "Carmen". Ndërkohë, ekskluzivisht për lexuesit e "Shqip" ajo tregon një lajm me të vërtetë të veçantë. Së bashku me Sajmir Pirgun në vitin 2010 do të interpretojnë "La Traviatën" ku ajo do të luajë Violetën, ndërsa Pirgu Alfredon. Pra, dy rolet kryesore në duart e dy shqiptarëve të talentuar për të cilën ajo mezi pret. "Të arrish në "Royal Opera House" me dy rolet kryesore të "La Traviatës" siç jemi ne dy shqiptarë pavarësisht se emrat tanë janë Ermonela apo Sajmir, unë si shqiptare do të ndihesha sikur fluturoja. Do të na duket vetja si puna e diellit që shkëlqen mbi këtë Londrën shpeshherë gri", thotë ajo duke buzëqeshur. Po të shikosh veprimtarinë artistike të Ermonela Jahos, çdo soprano në moshën e saj do ta kishte zili. Por fatkeqësisht, ajo nuk është shumë e njohur në vendlindje ku që në moshën 17-vjeçare u duartrokit si një Violetë e vogël në "La Traviata". "Mbase nuk jam shumë interesante për mediat atje që më kanë mbyllur shpeshherë derën kur kam pasur ndonjë koncert apo arritje në skenat botërore", përgjigjet Ermonela. Ajo sqaron se në Shqipëri i është dukur vetja e parëndësishme, madje edhe në një interpretim të sajën tre vjet më parë në Tiranë kur po interpretonte në skenë i dërguan një letër anonime ku i thoshin se ajo ishte askushi dhe nuk e meritonte të interpretonte në atë skenë. Natyrisht që ka ndier keqardhje siç edhe e pranon, por karriera e saj brilante nga viti në vit në skenat botërore, ishte përgjigjja më e mirë për këtë letër. Për herë të parë gjatë intervistës në "Shqip" sopranoja Ermonela Jaho rrëfen edhe anën tjetër të saj, Ermonelën jo artiste në jetën e përditshme. Ajo është e martuar me një bashkëshort me background artisti të cilin e dashuroi që në bankat e shkollës në Tiranë. "Jeta private mbetet private. Jam martuar me një shokun e klasës shqiptar dhe jetojmë bashkë shumë të lumtur në Amerikë. Ai ka studiuar për Muzikologji në Tiranë, por emigroi në Amerikë pas fitimit të Green Card duke e filluar nga e para. Ai u specializua për Elektronikë dhe tani punon për IBM duke mos e lënë pasionin për artin të cilin e ndajmë bashkë. Bashkëshorti është një ndihmë e madhe, pasi më të shumtën e kohës jam nëpër botë me koncerte dhe ai për mua është një mbështetje e rëndësishme. Ervini më bën të ndihem me këmbë në tokë", tregon Jaho për jetën e saj private. Suksesi i saj në Londër theu akullin e publikut britanik, duke i bërë që ata ta duan këtë soprano. Kjo vërehet jo nga dëshira e ne shqiptarëve për ta pasur Ermonelën përsëri në Londër e shërbyer si një ambasadore në përmirësimin e imazhit të shqiptarëve në Angli. Mjafton të lexosh komentin e një operalogu britanik, i cili në faqen e tij në internet shkruan. "Bravo Ermonela Jaho, Anna Netrebko tani mund të shkoni në shtëpi". Nuk ka dyshim se nga tani e tutje emri Ermonela Jahos do të mbahet mend gjatë. Për një arsye të vetme. Ajo i suprizoi të gjithë duke bërë që emri i ruses Anna Netrebko të mbetej vetëm si kujtim në broshurat apo posterat e shfaqjes.


You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Sunday, 27 January 2008

Faleminderit te gjitheve

Te nderuar miq.

Sot mbushen plot dy vjet nga dita kur une raportova lajmin e pare per televizionin Top-Channel, pas nje periudhe pune tre vjecare si korrespondent i Gazeta Shqiptare dhe News24.

Ka qene nje enderr per mua qe nje dite te thoja Muhamed Veliu Top-channel Londer.

E ndjeja te detyryshme t'ju dergoja kete email duke ju FALENDERUAR te gjitheve ju qe me keni perkrahur, pergezuar, kritikuar dhe keni marre mundimin te me telefononi duke me njoftuar per ngjarje te ndryshme ne komunitetin shqiptar ne Angli.

Kjo tregon besim tek une dhe median per te cilen punoj, mbi te gjitha shton nje pergjegjesi te jashtezakonshme ne misionin tim si gazetar i ketij komuniteti.Nuk dua te le pa permendur ata te cilet ne keto dy vite nuk kane lene gje pa shpifur ne adresen time si korrespondent i Top-Channel, per arsye nga me te ndryshmet.

Ata te cilet me kane kercenuar madje edhe nje person qe ka perdorur dhune fizike ndaj meje, duke i thene se Muhamed Veliu mbetet dhe do te vazhdoje te jete i palekunder ne misionin e tij, ne raportimin e ngjarjeve nga Anglia packa se u prishen interesat atyre te cileve me 28 Nentor 2007 me kane kercenuar se mund te me eleminojne fare lehte pa e marre vesh njeri.

Edhe nje falenderim per koleget e gazetes Albanian Mail te cilen e themelova ne 2003.

Nje falenderim per servirjen e lajmit atyre pak lexuesve qe kane, se isha pushuar nga puna si korrespondent i Top-Channel duke shpifur sikur kete ja kishte deklaruar drejtori informacionit ne Top-Channel zoti Sokol Balla.

Fakti qe une vazhdoj te punoj perseri per Top-Channel eshte pergenjeshtrimi me i mire i asaj qe ata shkruajten duke ulur edhe njehere tjeter kredibilitetin tek lexuesi i tyre.

Do te jem shume mirnjohes nese do te vazhdoni te me telefononi me problemet shqetesimet tuaja, per ti trajtuar ne televizionin me te madh, tashme kombetar Top-Channel.

Motoja ne departamentin tone te lajmeve eshte LAJMI KALON NGA NE.Edhe ne Angli lajmi ka kaluar nga ne me shpejtesi, saktesi duke u bere keshtu i vetmi televizion ne Shqiperi i cili transmeton lajme nga komuniteti shqiptar ne Britanine e Madhe.

Kjo fale jush te dashur miq qe zgjidhni Top-Channel per tu informuar dhe ja besuar vetem atij lajmet nga Britania e Madhe.Edhe njehere faleminderit nga zemra te gjitheve.Ju jam shume mirnjohes.

Me respeket me te zgjedhura
Muhamed Veliu
Korrespondent i Top-Channel
Londer

You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Prostitucioni në Londër nga aleanca shqiptare-lituaneze-kineze

Policia britanike identifikon bashkëpunimin e rrallë. Përfitojnë miliona paund

Nga Londra
Muhamed Veliu


Grupet kriminale shqiptare në Angli që merren me prostitucion kanë forcuar aleancën në krim, me partnerë nga Lituania dhe Kina. Ky konstatim është pohuar nga shefi i antiprostitucionit për Londrën, David Eyles. "Lituanezët, me anë të forcës, i detyrojnë gratë apo vajzat të udhëtojnë drejt Britanisë. Së bashku me to, ata sjellin edhe drogë. Më pas, ia shesin vajzat shqiptarëve apo kinezeve", ka deklaruar ai. Sipas Eyles, është jo e zakonshme të shikosh këto tre grupe kriminale me nacionalitete dhe strukturë operacionale të ndryshme, të bashkëpunojnë kaq ngushtë me njëri- tjetrin. Për numrin një të antiprostitucionit londinez, kjo aleancë është forcuar, pasi kooperimi mes tyre ka rezultuar i suksesshëm dhe shumë fitimprurës, e si pasojnë lidhja mes tyre bëhet edhe më solide. "Është hera e parë që ne identifikojmë një bashkëpunim të tillë mes shqiptarëve, lituanezëve dhe kinezëve. Zakonisht, në të shkuarën, kemi vërejtur se grupet kriminale në kontrollin e prostitucionit rivalizojnë njëri-tjetrin, deri në atë pikë sa përplasen egërsisht me armë, duke shkaktuar viktima, për kontroll territori", nënvizon Eyles, një specialist policie me një përvojë 30-vjeçare. Për të kuptuar si funksionon kjo lidhje e këtyre tre gupeve kriminale, ai pohon se në këtë aspekt kanë hasur vështirësi, pasi kanë të bëjnë me tre kultura. Eyles pranon se ky bashkëpunim nuk është ndërtuar për një natë apo një muaj. Janë dashur vite që ky bashkëpunim mes këtyre grupeve kriminale të arrijë në këtë nivel ku është sot, nga i cili përfitohen miliona paund. Zyrtarë të Scotland Yard, që monitorojnë dhe analizojnë aktivitetin e grupeve kriminale në Britani, thonë se kjo është hera parë që ata shikojnë një kombinim të tillë shqiptaro-lituanez-kinez. Gjatë viteve të shkuara janë me dhjetëra rastet kur shqiptarë të arrestuar e më pas të dënuar nga drejtësia britanike kanë rezultuar me lidhje të forta me grupet lituaneze. Disa ditë më parë, në qytetin e Lidsit, në Anglinë Veriore, policia shkatërroi një grup kriminal shqiptaro-lituanez që merrej me shfrytëzimin e vajzave për prostitucion. Ftohtësinë e prangave angleze e kanë provuar një shqiptar, që, sipas policisë, drejtonte operacionin e shfrytëzimit të vajzave si dhe tre lituanezë, dy prej të cilëve femra. Emigranti shqiptar, Nazif Selini, i cili kishte kërkuar azil në Angli si shtetas jugosllav, ishte koka e këtij grupi kriminal. Ai së bashku me 3 lituanezët kanë dalë përballë gjykatës "Leeds Crown Court", duke u përballur me akuzat për trafikimin e vajzave lituaneze drejt Anglisë, kontrollin e trafikut të tyre brenda Anglisë, kontroll prostitucioni për qëllime përfitimi, pastrim parash, përdhunim dhe ngacmim seksual. Më shumë se 45 shqiptarë vuajnë dënime të rënda në burgjet angleze për trafikimin e shfrytëzimin e lituanezeve në Britaninë e Madhe. Në të gjitha këto raste, vajzat e trafikuara kanë dhënë dëshmi në gjykatë duke "gozhduar" në gjetjen fajtor të ish- tutorëve shqiptarë. Megjithatë dënimet e rënda nga drejtësia britanike nuk kanë kontribuar aspak në uljen e numrit të shqiptarëve të përfshirë në prostitucion.


You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Friday, 25 January 2008

Angli, dështon ekstradimi Frrok Koçekut

Gjykatësi britanik i merr si të mirqena gënjeshtrat gjatë dëshmisë

Angli, dështon ekstradimi Frrok Koçekut

Zbulohet i gjithë mashtrimin e dibranit “wanted” për vrasje

Nga Londra
Muhamed Veliu

Gënjeshtrat e rrëfyera me kujdes në një gjykatën londineze, përfshi lotët e derdhur, kanë shpëtuar nga ekstradimi një shqiptarë i dënuar në mungesë me 15 vjet burg, për vrasje.Pas 17 seancash gjyqësore Frrok Koçeku ka mësuar se mund të vazhdojë së jetuari i qetë në Angli duke evituar përballjen me drejtësinë shqiptare, si pasojë e bllokimit me sukses të ekstradimit. Njëkohësisht duke shënuar një precdent të rrezikshëm për fatin e tetë bashkëkombasve të tij të arrestuar në Angli por që janë në pritje të proceseve të ekstradimit.


Vendimi

Gjykatësi Quetin Purdy në vendim e tij prej gjashtë faqesh, ka besuar 100% dëshminë e Koçekut se nëse do të ekstradohej në Shqipëri nuk do ti bëhej një gjygj i drejtë si pasojë e persekutimit politik nga qeveria aktuale.Sipas gjykatësit esktradimi nuk mund të quhet e legjitim, pasi krimi ka ndodhur 11 vjet më parë dhe kërkesa e Qeverisë Shqiptare është shumë e vonuar.Ndërtimi i një jete të re nga Frrok Koçeku ka qënë një tjetër shkak për ti thënë JO ekstradimit.“E shkarkoj nga përgjegjësia për të ekstraduar zotin Koçeku në Shqipëri duke u bazuar në kohën që ka kaluar kur ka ndodhur krimi,të drejtat e njeriut dhe çështjen e rigjykimit. Jam i pasigurtë që kjo gjykatë të vendosë se garancia e Qeverisë Shqiptare për rigjykimin e tij nëse ekstradohet do të zbatohet.” shprehet gjykatësi britanik në vendim.Më tej gjykatësi Purdy çuditërisht nuk e quan Koçekun një person në arrati për t'ju shmangur drejtësinë paçka se ai në vitin 1998 kur ai mbërriti në Angli, kërkoi azil politik me nacionalitet tjetër duke dhënë emrin Gëzim Pirgu.Nëse ai me të vërtetë ishte persekutuar siç deklaroi gjatë procesit të ekstradimit, fare mire mund të kërkonte azil si qytetar shqiptar i persekutuar në Shqipëri.Ish mësuesi Koçeku nga fshati Fushë Lurë i Dibrës i dënuar në mugesë me 15 vite burg, për vrasjen e Besim Busit në 10 Tetor 1996 në dëshminë e tij e ka përshkruar persekutimin duke deklaruar se familja Koçeku ishte e vetmja katolike, në atë fshat dhe persekutohej sistematikisht nga myslimanët ziliqarë pasi ata kishin shumë prona.Po sipas dëshmisë së Koçekut në gjykataë, gjatë verës së shkuar ata i kishin djegur 300 hektarë pyje pronë e familjes së tij në Parkun Kombëtar në Lurë.Nëna zonja Liza Koçeku pastruese në Spitalin e Lurës, dhe vëlllai Lazer Koçeku ushtarak, pas arrestimit të tij në Angli, në Nëntor 2006, ishin persekutuar.Nëna duke ja hequr nga puna ndërsa vëllait i kishin ndërprerë rrogën. Dhe se një firmë italiane po ndërtonte një stacion elektrik mbi pronat e familjes Koçeku pa lejen e tyre, gjë për të cilën ai ishte ankuar në Ambasadën Italiane në Tiranë përmes telefonit.E gjithë kjo dëshmi sëbashku me argumentat e avokatit mbrojtës për shkelje të drejtave të njeriut apo mos rigjykimit siç e kërkon akti ekstradimit britanik çuan në bllokimin me sukses të ekstradimit për në Shqipëri të ish mësuesit vrarës.

Mashtrimi

Nga një invetigimim rreth dëshmisë së Frrok Koçekut rezulton se ajo është tërësisht e fabrikuar që përbën një krim të dënushëm deri me burg përjetë nga drejtësia britanike, nëse do të hetohet.Zyrtarë të komunës Fushë Lurë pasi janë kontaktuar, kanë deklaruar se atje jetojnë 7 familje të krishtera dhe se familja Koçeku nuk është e vetmja. Ata jetojnë në paqe të plotë me banorët e tjerë mysliman dhe kurrë nuk është shënuar ndonjë konflikt me karakter fetar.“Djegja e 300 hektarëve pyje ka ndodhur për shkaqe të temperaturave të larta gjatë verës së shkuar dhe jo djegjes së qëllimshme siç mund të ketë pretenduar zoti Koceku në gjykatë. Policia e qarkut Dibër gjatë verës së shkuar nuk ka trajtuar asnjë nga këto zjarre si të qëllimshme por thjesh të shkaktuara nga temperaturat e larta” ka deklaruar Aldo Puca zëdhësi i policisë për qarkun Dibër.Ndërsa zëdhënsja e Misinistrisë së Shëndetësisë Zhaneta Tomlini hedh dritë për shkakun e vërtetë të “largimit” nga puna të zonjës Liza Koceku pastruse në qëndrën shëndetësore Lurë jo spitalin Lurë siç deklaroi Frrok Koçeku në gjykatë.“Largimi zonjës Koçeku është bërë për arsye se i kishte ardhur koha për pension dhe nuk ka aspak background politik” saktësoi zëdhënsja Tomlini.Mashtrim ka rezultuar edhe pjesa e dëshmisë ku Frrok Kooeku deklaroi se vëllait Lazër Koçeku ushtarak në Tiranë, i është ndërprerë rroga fillim vitin 2007 për disa muaj në shenjë presioni pasi autoritet shqiptare e dinin se ai po kundërshtonte ekstradimin në Londër.Nga një kontakt telefonik me Zëdhënësin e Ministrisë së Mbrojtjes Igli Hasani rezulton se në bankën e të dhënave të kësaj ministrie nuk rezulton që Lazër Koçeku të jetë në organikën e kësaj ministrie.Duket qartë se gënjeshtrat e Frrok Koçekut të përpiluara me kujdes dhe lotët e derdhur në gjykatë kanë kryer efektin e duhur, duke bërë që gjykatësi Purdi të besojë atë dhe jo drejtësinë shqiptare hartuese e kërkesës për ekstradim, e cila ka 14 ditë për të apeluar vendimin.

You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Pretenca, 16 vjet burg për trafikun në Angli

Pretenca, 16 vjet burg për trafikun në Angli

Përveç dënimit me burg rrezikon edhe sekuestrimin e vilës së tij trekatëshe një i akuzuar për trafik femrash, i cili është shpallur në kërkim ndërkombëtar. Dje në Gjykatën e Krimeve të Rënda në kryeqytet janë lexuar konkluzionet përfundimtare të akuzës në procesin ndaj të pandehurit Agim Kabashi, i cili akuzohet për trafikimin dhe më pas shfrytëzimin për prostitucion të një shtetaseje, disa vite më parë në Angli. Gjatë pretencës së tij, prokurori i çështjes ka kërkuar shpalljen fajtor të Kabashit për akuzën e ngritur dhe dënimin e tij me 16 vjet heqje lirie. Në të njëjtën kohë akuza kërkoi edhe sekuestrimin e pronave 36-vjeçarit nga Durrësi, pasi dyshohet se ato janë vënë me paratë e ardhura nga trafiku i kryer në Angli. Masa e sekuestros është kërkuar për një vilë trekatëshe, në lagjen Nr. 14 Durrës, që mendohet se është pronë e Kabashit, që po gjykohet në mungesë.

You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Akuza për ngacmim seksual shqiptarit viktima 11-vjeçare dëshmon duke qarë

Akuza për ngacmim seksual shqiptarit viktima 11-vjeçare dëshmon duke qarë

Prokuroria londineze: Vesel Murataj i tregoi organin gjenital të miturës

Nga Londra
Muhamed Veliu

Një emigrant shqiptar në Londër është përballur dje në Gjykatën britanike të Krimeve të Rënda "Old Bailey", si i akuzuar për ngacmim seksual dhe përdorim dhune ndaj një të miture. Prokuroria londineze, në seancën e parë gjyqësore, ka akuzuar Vesel Muratajn për tregimin e organit gjenital dhe tentativën për të futur në makinë një vajzë 11-vjeçare. I akuzuari Murataj, që në momentin e arrestimit po ashtu edhe në gjykatë, ka mohuar të dyja akuzat e ngritura ndaj tij. Mësohet se Murataj kishte kërkuar azil politik në Britaninë e Madhe si një person që i përkiste komunitetit rom në Kosovë, të cilët persekutoheshin nga shqiptarët dhe ish-ushtarët e UÇK-së. Ministria e Brendshme britanike, "Home Office" i kishte garantuar leje-qëndrim përgjithmonë në Britani.
Ngjarja ka ndodhur më 10 shtator 2007 në zonën Eltham në Jug të Londrës, ndërkohë që shqiptari do të arrestohej 10 ditë më vonë, pasi minorenia e identifikoi gjatë një parade identifikimi. "Zoti Murataj ndali makinën tip "Benz" ngjyrë gri, fillimisht e pyeti vajzën për drejtimin e një rruge, ndërkohë që, sipas saj, ai kishte pantallonat e zbërthyera, duke mbajtur të shtrënguar me dorë organin gjenital", ka thënë prokurorja Bozi Sheffi. Më tej, duke lexuar aktakuzën, prokurorja i ka treguar gjykatës se shqiptari më pas është afruar te dera e pasagjerit dhe ka kapur prej krahu vajzën. Ajo, pas pak, duke përdorur forcën ka mundur të largohet, duke kërkuar ndihmë te një kalimtare. E gjithë ngjarja është parë nga shoferi i një autobusi, i quajtur Xhozef Kemp, i cili përmes radios ia komunikoi incidentin zyrës së kontrollit të autobusëve. Ata më pas kanë njoftuar policinë për incidentin e raportuar nga punonjësi i tyre. Ai dëshmoi në gjykatë, duke rënduar pozitën e të akuzuarit Vesel Murataj.
Gjithçka që ka ndodhur atë mëngjes kur ajo po shkonte në shkollë, 11-vjeçarja e ka rrëfyer në gjykatë përmes një video-konference, në mënyrë që mos të shikonte Muratajn. Fillimisht gjykata pa përmes monitorëve një intervistë të vajzës dhënë disa orë pas incidentit, e cila ishte regjistruar me figurë në stacionin e policisë. E mitura tregon me detaje çfarë kishte përjetuar. Me qetësi ajo u përgjigjej pyetjeve të dy oficerëve të policisë nga operacioni "SAFARE", që merret me hetimin e të tilla krimeve me natyrë seksuale. Më pas, gjykata ka proceduar me marrjen e vajzës në pyetje nga prokurorja Sheffi dhe avokatja mbrojtëse zonjusha Bonsu. Në një moment, gjatë dhënies së dëshmisë përmes një video-konference, duke qarë ajo tha se kur ai e tërhoqi nga dora ishte e frikësuar se po e fuste në makinë me qëllim rrëmbimi.

You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Wednesday, 23 January 2008

Shpartallohet banda shqiptaro-lituaneze

Shpartallohet banda shqiptaro-lituaneze

Trafikonin prostituta nga Lituania

Nga Londra
Muhamed Veliu

Policia e qytetit të Lidsit në Anglinë Veriore ka shkatërruar një grup kriminal shqiptaro-lituanez që merrej me shfrytëzimin e vajzave për prostitucion. Ftohtësinë e prangave angleze e ka provuar një shqiptar, që sipas policisë drejtonte shfrytëzimin e vajzave si dhe tre shtetas lituanezë, dy prej të cilëve femra. Emigranti shqiptar Nazif Selini, i cili kishte kërkuar azil në Angli si shtetas jugosllav, ishte koka e këtij grupi kriminal. Ai, së bashku me lituanezët, kanë dalë dje përballë Gjykatës "Leeds Crown Court", duke u përballur me akuzat për trafikimin e vajzave lituaneze drejt Anglisë, kontrollin e trafikut të tyre brenda Anglisë, kontroll prostitucioni për qëllime përfitimi, pastrim parash si dhe përdhunim dhe ngacmim seksual. Arrestimi këtij grupi kriminal u ndërmor nga "Ëest Yorkshire Police", pas një investigimi disa mujor të aktivitetit të tyre në dy zona, "Harehills" dhe "Roundhay", ku shfrytëzonin vajzat e trafikuara. Një zëdhënës i "West Yorkshire Police" nuk ka pranuar të thotë me saktësi se sa është numri viktimave të identifikuara nga policia.

You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Bucpapaj&Hysenaj ne pritje te vendimit

Bucpapaj&Hysenaj ne pritje te vendimit

Nga Gjykata e krimeve te renda Old Bailey
Muhamed Veliu


Në katin e dytë të gjykatës qëndrore të krimeve në Londër, përpara sallës së gjygjit nr 5 si asnjëherë tjetër shikon një mori gazetarësh.
Jashtë saj e njëjta situatë. Kamera të instaluara gati dhe fotografë që presin.
Pritja e tyre varet nga kohëzgjatja e marrjes së vendimit në fajtor apo jo fajtor nga juria e shtatë të akuzurve për grabitjen e 53 milion paund më e madhje në historinë e Britanisë së Madhe.
Në pritje mes ankthit janë edhe dy shqiptarët e akuzuar Jetmir Bucpa dhe Ermir Hysenaj, të cilët sëbashku me pesë britanikët e bashkëakuzuar nuk i kanë pranuar akuzat në këtë proces që zgjati 7 muaj.
Mbi ta rëndon akuza për konspiracion në grabitje, perngmarrje dhe armbajtje paleje.
Sipas prokurorisë Hysenaj është cilësuar si njeriu i brendshëm i grabitësve që dha informacion për hyrje daljet e depos.
Ndërsa për Jetrmir Bucpapën po sipas akuzës ai ishte njeriu që kalonte informacionin tek grupi grabitësve dhe se ka marrë pjesë në pengmarrjen e gruas së menaxherit të depos.
Gjykatësi Penry-Davey katër ditë më parë i tha antarëve të jusrisë ti shqyrtojnë provat e dëgjura gjatë procesit me ftohtësi dhe qetësi duke shtuar.
“Nuk ka dyshim në seriozitetin e performancës në detyrën tuaj e cila nis që tani. Është një detyrë e rëndësishme e cila kërkon nga ju të kryhet pa asnjë lloj emocioni”.
Mediat e këtushme ka kohë që janë në garë për të mësuar sa më shumë informacione të reja rreth të akuzuarve, por një gjë është e sigurtë.
Emri Shqipërisë nësë dy shqiptarët do të gjenden fajtor në këtë krim me profil të lartë dhe me interes jo të vetëm mediave britanke por edhe atyre botërore do të lakohet për keq.
Ndërkohë në komunitetin shqiptarë në Angli dy djemt me origjinë nga Tropoja shikohen si heronj. Për një fakt shumë të thjeshtë.
Sepse ata hynë në historinë e Britanisë së Madhe duke u përshinë në një krim që kërkon guxim të jashtëzakonshëm dhe jo si shumë bashkombas të tyre që përvec përfshirjes në botën e prostitucionit nuk dinë të bëjnë gjë tjetër.

You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Monday, 21 January 2008

Ermonela Jaho korr sukses në operën mbretërore londineze

Talenti i sopranos shqiptares mahnit publikun. Ajo realizon një interpretim fantastik në rolit e Violetës në operën "La Traviata" të Verdit

Nga "Royal Opera House" Muhamed Veliu

Sopranoja shqiptare, Ermonela Jaho, është duartrokitur gjatë nga publiku britanik në debutimin e saj të parë në "Royal Opera House" të Londrës. Ardhja e saj në këtë opera me famë botërore, për të interpretuar rolin e Violetës në "La Traviata" të Verdit, ka qenë tejet e rastësishme dhe e papritur për sopranon 33-vjeçare. Në dy netët e para të kësaj opere, roli i Violetës është interpretuar nga sopranoja Anna Netrebko. Por një sëmundje e saj me bronshit ka detyruar organizatorët e kësaj operea të zgjedhin shqiptaren Jaho për ta zëvendësuar. Ermonela Jaho, e ardhur me urgjencë nga New Yorku, ku jeton, në debutimin e saj të parë në Londër ka shpalosur një performancë jashtëzakonisht të lartë, duke interpretuar me nivel rolin e besuar. Për të ishte një sakrificë e jashtëzakonshme, pasi kishte shumë pak kohë për të bërë provat e duhura me aktorët e tjerë. Në fillim të operës audienca u duk pak e zhgënjyer, pasi nuk interpretonte sopranoja ruse, Anna Netrebko, siç ata e prisnin. Ermonela, nga njëri akt në tjetrin e rriti nivelin e interpretimit, duke fituar duartrokitjet e publikut. Në aktin e tretë dhe final, performanca e saj ishte e jashtëzakonshme, duke e mbyllur me sukses 3 orë e 12 minuta shfaqje. Njëri nga spektatorët do të deklaronte: "Interpretimi i saj ishte me të vërtetë fantastik". Zhgënjimin e tyre në fillim të operës e ka shuar me origjinalitet shqiptarja Jaho, e cila ka dhënë maksimumin, duke interpretuar me shpirt. Për sopranon shqiptare, e cila mbërriti në Londër pas një debutimi të suksesshëm në Berlin, interpretimi i Violetës është i njohur dhe njëkohësisht i dashur për të. Debutimin e parë në këtë rol në Tiranë ajo e ka pasur që kur ka qenë 17 vjeçe. Violetën ajo do ta interpretonte edhe në skena të tjera me famë botërore, si në operën shtetërore në Mynih, teatrin "San Carlo" të Napolit, teatrin "Xhuzepe Verdi" në Trieste, si dhe në opera të ndryshme në Amerikë. Jaho është vlerësuar nga kritikët britanikë si një soprano me zë dhe interpretim skenik të një lloji të veçantë. Pas Inva Mulës, me rolin e Violetës, Saimir Pirgut në operën Xhani Skici, Armonela Jaho bëhet e treta shqiptare e cila interpreton me sukses në Covent Garden, ku ndodhet "Royal Opera House".

Veprimtaria

Ishte ende fëmijë kur Ermonela prek për herë të parë artin muzikor në Qendrën Kulturore të Fëmijëve në Tiranë, e më pas në Liceun Artistik dhe në Akademinë e Arteve në Tiranë. Më 1993 seleksionohet nga sopranoja e njohur italiane, Katja Riçareli, në Tiranë, vlerësim ky që e çoi Ermonelën në konservatoret e Mantovës dhe në "Santa Çeçilia" të Romës. Debuton me partnerë të tillë si Paolo Montarselo, Juan Diego Flores, Jean Pierre Trevisani etj. Jep një koncert recital në teatrin "Cavour Imperial" në Romë, në vitin 1998. Interpreton në operën "Maddalena" të Prokofievit në teatrin e operës në "Santa Cecilia" të Romës, transmetuar direkt nga RAI 3 në vitin 1998. Në festivalin "Puçinian" këndon arie të G.G. Luporinit në Luça. Në shkurt 1999 këndon në rolin e Mimisë në operën "Boheme" të Puçinit në Bolonja. Merr pjesë në Festivalin e Stress, duke interpretuar "Srabat Meter" të Pergolezit me orkestrën "Giusepe Verdi" dhe në shtator të vitit 1999 merr pjesë në koncertin "Le voci di 2000" të zhvilluar në teatrin "Reggio di Parma" në Parma. Këndon në Venecia në vitin 2000 në rolin e Suzanës në operën "La nozze di Figaro" të Mozartit. Në shtator 2000 këndon në Torino operën "La Rosignol" të Stravinskit me orkestrën e Rai-t të Torinos e transmetuar nga RAI. Ftohet në Irlandë të marrë pjesë në "Oxford Festival", ku interpreton Violetën nga opera "Traviata". Ftohet të interpretojë në një koncert bamirësie në Kosovë në janar të vitit 2001. Në mars të 2001 zhvillon një recital në Bejrut në festivalin "Al Bustan". Në maj 2001 merr pjesë me trupën operistike të Tuluzës në Francë, ku këndon rolin e Suzanës nga opera "Dasma e Figaros". Në korrik 2001 ftohet në koncertin GALA, organizuar në Dublin. Në gusht 2001 merr pjesë në Festivalin Rosinian në Pesaro, duke kënduar "Srabat Mater" të Rosinit e transmetuar direkt nga RAI. Në tetor 2001 kthehet në Irlandë në festivalin e përvitshëm me zërat më të mirë, ku këndon operën "Kapuletët e Montegët" të Belinit në rolin e Xhuljetës, si dhe "Sapho" të Masnet në rolin e Irenës, dhënë drejtpërsëdrejti nga BBC e incizuar në CD. Në shtator-nëntor 2002 në Irlandë interpreton rolin e Xhildës nga opera "Rigoleto" e Verdit. Ermonela Jaho ka shkëlqyer në aktivitetet e fundit në operën "Karmen" me rolin Michaela-s, në teatrin "Verdi" në Trieste. Në maj 2007, sopranoja e talentuar Ermonela Jaho ka luajtur në TOB, Shqipëri, në rolin e Violetës te "Traviata". Dy vjet më parë, në 2006, asaj i është dhënë rasti që të punojë me maestro Massimo Ranierin në teatrin "Verdi" të Triestes. Ka interpretuar në teatrot "Aligheri", "Ravena", "Piçolo", "Scala"-Milano dhe në shumë skena të tjera botërore, ku së fundmi në atë londineze, "Royal Opera House". Bashkëpunimet kanë qenë me televizionin italian RAI, "Mondovisione", BBC etj. Rezulton të jenë 10 CD me zërin e saj. Fiton çmimin special të kritikës në konkursin "G.Pucini" në Milano në vitin 1997. Fiton çmimin e parë në konkursin "Spuntini International" në Ankona të Italisë në vitin 1999. Çmimin e parë në Zandonai Competition, në Rovereto, Italy, 1999. "Best Singer" of the Wexford Festival, në Wexford Ireland 2000.



You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Friday, 18 January 2008

Britani e Madhe, mbrojtja e dy "pedofilëve" vonon ekstradimin

Juristja shqiptare përpilon raportin për bllokimin e ekstradimit të anglezëve

Nga gjykata "City of Westminster Magistrate Court"
Muhamed Veliu

Një gjykatës britanik ka kritikuar ashpër avokatët mbrojtës, në procesin e ekstradimit të Kristo Kristodolou dhe Robin Arnold, të cilët kërkohen nga drejtësia shqiptare si të akuzuar për pedofili. Në gjykatën e ekstradimeve "City of Westminster Magistrate Court", gjykatësi Quentin Purdy nuk ka qenë i kënaqur me përgatitjet e avokatëve mbrojtës, të cilët po tentojnë bllokimin e ekstradimit të klientëve të tyre. Vitin e shkuar, në seancën e fundit ata kanë kërkuar kohë për përgatitjen e dy raporteve nga një eksperte shqiptare e kontraktuar në lidhje me legjislacionin penal shqiptar, si dhe me gjendjen e burgjeve. Seanca e djeshme parashikonte që pala mbrojtëse të raportonte progresin në këto dy raporte. Por, sipas avokatit mbrojtës të Arnold, është përfunduar një draft paraprak i është dërguar CPS (organit të akuzës britanike), por jo ai përfundimtari. Ky lajm nuk është pritur aspak mirë nga gjykatësi, i cili është shprehur se nëse dorëzimi i raportit nuk kryhet në kohë dhe i dërgohet Ministrisë së Drejtësisë shqiptare për të kthyer përgjigje atëherë rrezikohet seanca e ardhshme, ku pritet nisja e gjyqit për të dy të arrestuarit. Gjykatësi Purdy, po ashtu ka kërkuar të njihet me kualifikimet e hartuese të raportit. "Ajo mund të jetë cilido. Mbase edhe një studente në vitin e parë për Drejtësi", ka ironizuar gjykatësi. Pas një pushimi të shkurtër, avokatët mbrojtës kanë mbledhur të dhëna se cilat ishin zhvillimet e fundit në lidhje me raportin. Më pas, ata i kanë raportuar gjykatës se ky raport përmban 9 pika ku analizohet mënyra e marrjes në intervistë e fëmijëve të abuzuar nga prokuroria shqiptare në këtë çështje. Po ashtu është mësuar se personi që po harton këtë raport është një juriste grua dhe se raporti do të jetë gati pas një jave. Në mbarim të seancës gjyqësore, të dy avokatët mbrojtës kanë refuzuar të tregojnë emrin e juristes, megjithëse e kishin në dosje. Ajo është kontaktuar të formojë raportin, "një armë" tjetër në duart e mbrojtjes për të bllokuar ekstradimin. Më 12 Shkurt është vendosur për fillimin e shqyrtimit të kërkesës shqiptare për ekstradimin.


You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Tuesday, 15 January 2008

Burgosen 2 “konsujt” shqiptarë të Europës

Kishin ndërtuar laboratorin më të madh kapur ndonjëherë në Angli

Burgosen 2 “konsujt” shqiptarë të Europës

Ju kapën 1,800 pasaporta boshe dhe 2,000 faqe biometrike


Nga Londra
Muhamed Veliu


Dy shqiptarëve të cilëve ju kapën 1,800 pasaporta boshe me vlerë më shumë se një milion paund janë dënuar nga një gjykatë londineze dhjetë vjetë burg në total.
Ata kishin ndërtuar laboratorin më të madh të falcifikimeve kapur ndonjëhere në Britaninë e Madhe, duke u shndërruar kështu në “konsuj” të shumë shteteve europiane në Londër
Denis Cenolli sëbashku me Altin Ibrahimin u dënuan me nga pesë vjet burg secili.
Edhe dy bashkëpuntorët e tyre bullgarë Krum Poibrenski dhe Kiril Velev,
që merreshin me distribucionin dokumentave të falcifikuar do të dënoheshin me tetë vite burg në total.
Të katër ata kanë pranuar akuzat për prodhim dhe shpërndarje të pasaportave të falcifikuara duke përfituar dënime të lehta.
“Sasija e pasaportave të sekuestruara gjatë këtij operacioni ishte më e madhja kapur ndonjëherë në Britaninë e Made. Besojmë se vlera e shitjes së tyre do të ishte mbi një milion paund” ka deklaruar në përfundim të procesit gjyqëso inspektori Nick Downing që hetoi këtë grup kriminal
Scotland Yard ka konfirmuar fillimin e një hetimi për sekuestrimin e aseteve brënda dhe jashtë Anglisë për dy shqiptarët dhe bullgarët.
Ndërkohë gjykatësi Anthony Bright urdhëroi dëbimin e tyre nga Anglia në fund të dënimit.
Sipas policisë londineze e cila shkatërroi këtë grup kriminal disa muaj më parë gjatë kontrollit të laboratorit në zonën Poplar Grove në Londër u gjetën 1,800 pasaporta boshe të shteteve të ndryshme europiane dhe aziatike mese tyre 212 pasaporta britanike.
Prej tyre 562 pasaporta finlandeze, 428 portugeze, 62 koreane. Gjithashtu pasaporta letoneze, sllovene, daneze, greke,italiane belge dhe franceze, përfshi një mori vulash të autoriteteve të emigracionit të këtyre vëndeve.
Krahas pasaportave boshe të shteteve europiane u gjetën edhe një numër i konsiderueshëm pasaportash shqiptare .
Ajo që ka shqetësuar më tepërmi policinë londineze është fakti se gjatë kontrollit u gjetën 2,000 faqe pasaportash biometrike teknollogji e cila ka pak kohë që është futur në përdorim. Pjesë e sekuestrimit ishin edhe 1,000 karta plastike boshe për prodhim patentash për drejtim atomjeti.
Cennoli, Poibrenski dhe Velev do të arrestoheshin brënda ambienteve të laboratorit. Ndërda Ibrahimi disa orë më vonë në një adresë tjetër në Londër.



You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Thursday, 10 January 2008

Angli, shqiptarja i përdredh kokën burrit

Policia e Mançesterit gjen të vdekur Elez Dautin. Akuzohet bashkëshortja, Emona

Nga Londra
Muhamed Veliu


Gruaja vret burrin. Personazhet janë shqiptarë, por skena ku luhet tragjedia ndodhet shumë larg prej vendlidjes se tyre, në Angli. Krimi në familje nuk ka kursyer të godasë rëndë një çift emigrantësh shqiptarë në veri të Anglisë. Një emigrant shqiptar, në qytetin e Mançesterit, është vrarë nga bashkëshortja. Elez Dauti është gjetur i vdekur në shtëpinë e tij në zonën Prestviç. Menjëherë pas ngjarjes, policia ka arrestuar bashkëshorten e tij, Emona Dauti. Një zëdhënëse e policisë së Mançesterit tha për "Shqip" se nuk dihen ende motivet që e kanë shtyrë 26-vjeçaren Dauti të ndërmarrë një akt të tillë. Zëdhënësja ka sqaruar se shkaku i vdekjes ka qenë përdredhja e kokës. Emona Dauti, nënë e dy fëmijëve, ka dalë të martën në mesditë përpara Gjykatës së Krimeve në Mançester, e akuzuar për vrasje.
Ky është rasti i dytë, kur krimi godet një familje shqiptare në Angli. Vitin e shkuar, për motive xhelozie, 38-vjeçari Sadik Duba nga Bulqiza goditi disa herë për vdekje në gjoks me thikë bashkëshorten Alida Duba. Kjo tragjedi në këtë familje, krahas një viktime, ka prodhuar një tjetër dramë, akoma më të rëndë, atë të katër fëmijëve të tyre, të cilët do të rriten jetimë me nënën e vdekur dhe babanë në burg. Ndërkohë, problemet brenda familjeve shqiptare në Angli, në mesin e vitit 2007, do të prodhonte një tjetër viktimë. Emigranti Vullnet Kastrati, 33 vjeç, nga Shkodra, u gjet i varur në shtëpinë e tij pas një sërë problemesh familjare. Frekuentimi i shumtë i lokaleve të basteve po kthehet në një problem të mprehtë për emigrantët shqiptarë të Anglisë. Shumë çifte po ndahen, ndërsa shumë të tjerë të zhytur në spiralen e basteve të pashpresë dhe kanë vite që nuk telefonojnë familjet. Ndërkohë, dhuna që bashkëshortët ushtrojnë ndaj grave është një tjetër problem me të cilin po përballen organizatat shqiptare, të cilat japin këshillime falas për to. Në disa raste është dashur ndërhyrja e policisë dhe më pas këshillimi burrave shqiptarë nga uniformat blu, që kjo dhunë të ndalojë. Shumë gra shqiptare në Angli po u drejtohen gjykatave, duke hapur procese divorci pafund ndaj bashkëshortëve. Vrasja e Elez Dautit e çon në 20 numrin e emigrantëve shqiptarë të vrarë në Britaninë e Madhe këto dhjetë vitet e fundit.
Dhuna dhe vrasjet kanë mundur "të kalojnë" edhe përtej Atlantikut, bashkë me familjet shqiptare, që kanë emigruar në të ashtuquajturën Tokë e Premtuar. Dy ditë më parë, një krim i pashembullt me protagonistë shqiptarë, ndodhi në Çikago të shtetit Illinois në SHBA. Një çift shqiptarësh të moshuar janë gjetur të vdekur dhe policia lokale dyshon se ata janë vrarë nga djali i tyre. Syrja Shehu, 66 vjeç, dhe Safo Shehu, 67 vjeç, u gjetën të vrarë me armë në shtëpinë e tyre. Mediat në Çikago, duke iu referuar hetimeve të policisë, raportuan se i dyshuari i parë për këtë ngjarje makabre është 33-vjeçari Artur Shehu, i cili ka telefonuar për të raportuar ngjarjen dhe është larguar nga shtëpia. Shkak mendohet se kanë qenë problemet financiare të djalit, që punonte si taksist.

You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Tuesday, 8 January 2008

You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Monday, 7 January 2008

Ekspozitë fotografike me tutorë shqiptar

Mizoria e trafikut të grave për prostitucion përmes fotove

Nga Londra
Muhamed Veliu

Një ekspozitë fotografike e cila tregon mizoritë e grave të trafikuara për prostitucion është hapur në aeropotin e Edingburgut në Skoci.
Në të janë ekspozuar shtëpitë publike, dhonat e tyre të cilat janë përdorur për tu shfrytëzuar gratë dhe vajzat e trafikuara në Britaninë e Madhe.
Nuk kanë mbetur edhe pa u ekspozuar tutorët, ata të cilat kanë risjellë skllavërinë në këtë vend i cili 200 vjet më parë, ju kundërvu skllavërisë. Emra të njohur të botës së krimit shqiptar të cilët po vuajnë dënime të rënda në burgjet angleze kanë qënë pjesë e kësaj ekspozite.
Fotot e Shaban Makës dënuar me 18 vjet, Ilir Bajrami 15 vjet burg dhe Tasim Axhamit dënuar me 21 vjet burg kanë qënë pjesë e ekspozitës.
Axhami sëbashku me Makën, Bajramin dhe disa të tjerë u shisnin,shqiptarëve në zonën e Shefildit për katër mijë paund gra dhe vajza lituaneze të trafikuara.
Kjo ekspozitë e para e llojit të saj në Britaninë e Madhe e quajtur “Slave Britain”(Skllavëria në Britani) u mundësua nga Amnesty International.
Fotot e përdorura janë mundësuar nga forca të ndryshme policore në Britani të cilat nën operacionin e koduar “Pentameter” kanë shkatërruar ogranizata kriminale që merreshin me shfrytëzimin e prostitucionit.
“Përmes kësaj ekspozite ne duam të tregojmë mizoritë që sjell prostitucioni për gratë e detyruara të përfshihen në të. Ne shpresojmë po ashtu se kjo ekspozitë do të bëj që të tjera viktima të bashkëpunojnë me ne. Prioritet i operacinit “Pentametër është të shpëtojë e marrë në mbrojtje viktimat e trafikut të prositucionit” ka deklaruar në hapje të ekspozitës Detective Chief Inspector David Bullen.
Në Angli ndodhen të burgosur më shumë se 50 shqiptarë të dënuar për trafikun e femra dhë shfrytëzimin e tyre për prostitucion.
Pamvarësisht se policia angleze shpeshherë,arreston tutorë shqiptarë të tjerë persona zënë vëndin e tyre pasi është një prej bizneseve më fitim prurës.
Sipas statistikave nga industria e sekstit në Britaninë e Madhe kap shifrat e 3 miliard paund në vit.
Gjatë vitit 2008 priten një sër procesesh gjyqësore në ngarkim të shtetasve shqiptarë të cilët kanë qënë pjesë e botës kriminale të prostitucionit në Britani.
Një gjykatës britanik duke dënuar grupin e Shaban Makës i cilësoi ata si njerëzit që kishin risjëllë në Britaninë e Madhe skllavërinë.
Kjo skllavëri moderne përfshi brutalitetin ndaj viktimave të tyre bëri që ata padyshim të jenë pjesë ideale e kësaj ekspozite që me të drejtë ishte titulluar “Skllavëria në Britani”.

You aren’t permitted to publish any material text of photo from this blogg. Any publication will be treated as breach of copyright.
© Veliupress copyright 2007

Blog Archive

About Me

Veliupress


View My Stats